پولشا بەلارۋس شەكاراسىنا اسكەرلەر جىبەردى. شەكاراعا قوسىمشا اسكەريلەر مەن ارنايى تەحنيكا دا جىبەرىلەتىنى حابارلاندى.
پولشا مەن بەلورۋس شەكاراسىنداعى ايماقتا ءتورت ادامنىڭ مۇردەسى تابىلىپ، مۇنى پولياك شەنەۋنىكتەرى "ۇيىمداستىرىلعان شابۋىل" دەپ اتادى. قازا تاپقاندار پولشا اۋماعىنا جەتۋگە تىرىسقان بوسقىندار دەپ سانالۋدا.
ۆارشاۆا شەكارالاس ايماقتاعى ميگرانتتاردى باقىلاۋ ءۇشىن قوسىمشا 500 ارنايى اۆتوكولىك جىبەردى. پولشا بۇل جاعداي تۋرالى " بەلارۋس پەن رەسەي ەلدەرى ەو مەن وعان مۇشە 27 مەملەكەتتىڭ جاعدايىن تۇراقسىزداندىرۋ ءۇشىن وسىنداي ارەكەتتەر جاساپ وتىر" دەيدى.
"ءبىز مينسك پەن ماسكەۋدەن ۇيىمداستىرىلعان ارەكەتتەردى كورىپ وتىرمىز" دەدى پولشا پرەمەر-مينيسترى ماتەۋش موراۆيەسكي جۋرناليستەرگە.
موراۆيەسكي ىشكى ىستەر ءمينيسترى ماريۋش كامينسكيمەن جانە شەكارا اسكەرلەرىنىڭ باسشىسىمەن كەزدەسۋدەن كەيىن "ءبىز پولشا شەكاراسىن تاباندىلىقپەن قورعايمىز" دەدى.
كامينسكي ءوزىنىڭ تۆيتتەرىندە "ءبىز كەز كەلگەن سەنارييگە دايىن بولۋىمىز كەرەك، سوندىقتان ءبىز شەكارانى قورعاۋدى ودان ءارى كۇشەيتەمىز" دەپ جازدى.
ول قوسىمشا اسكەرلەر مەن سەگىز ارنايى تەحنيكا وسى اپتادا شەكاراعا جىبەرىلەتىنىن مالىمدەدى.
جەكسەنبى كۇنى پولياك شەنەۋنىكتەرى يراك ازاماتتارى دەپ بولجانعان ءۇش ەر ادامنىڭ ءمايىتى پولشا شەكاراسىنان تابىلعانىن، ال بەلارۋس بيلىگى شەكارادان ءبىر مەتر قاشىقتىقتا يراكتىق ايەل تابىلعانىن حابارلاعان بولاتىن.
پولشا مەن ليتۆا شەكاراداعى وقيعالار "بەلارۋس پرەزيدەنتى الەكساندر لۋكاشەنكو رەجيمىنىڭ ەو-نى تۇراقسىزداندىرۋعا باعىتتالعان شابۋىلىنىڭ ءبىر بولىگى" دەيدى.
باتىس بەلارۋستىڭ ارەكەتىن مينسكىگە سالىنعان سانكسيالار ءۇشىن كەك الۋ دەپ سانايدى.
باتىس ەلدەرىنىڭ سانكسيالارى لۋكاشەنكونىڭ 30 جىلعا جۋىق بيلىك قۇرۋىنا جانە ساياسي وپپوزيسيانى قىسپاققا الا بەرگەنىنە جاۋاپ رەتىندە سالىنعان.
پىكىر قالدىرۋ