بريتانيالىق سوعىس ۇشاقتار مەن كەمەلەر توبى وڭتۇستىك جۇڭگو تەڭىزىنە كىردى. ۇلىبريتانيا كورولدىك اسكەري-تەڭىز كۇشتەرىنىڭ اقپاراتىنشا، سوعىس ۇشاقتارىن تاسىمالدايتىن اعىلشىن اسكەري كەمەسى تايۆان بۇعازى ارقىلى ءجۇزىپ وتكەن. بۇل تۋرالى گەرمانيانىڭ DW باسىلىمى حابارلادى.
"شىعىس جۇڭگو تەڭىزىندەگى سەرىكتەستەرمەن جانە وداقتاستارمەن جۇمىس ىستەگەننەن كەيىن، ءبىز ءقازىر تايۆان بۇعازى ارقىلى ۆەتنامعا بارامىز" دەپ جازدى اسكەري ۇشاقتار تاسىمالدايتىن سوعىس كەمەسىنەن قۇرالعان ۇلىبريتانيانىڭ اسكەري سوققى توبى.
نەمىس باسىلىمىنىڭ اقپاراتىنا سايكەس، ۇلىبريتانيانىڭ اسكەري كەمەسى تايۆان مەن كوممۋنيستىك قىتايدى بولەتىن تار سۋ جولى ارقىلى ءبىرىنشى رەت وتكەن.
اقش اسكەري كەمەلەرى بۇعازدا "ناۆيگاسيا ەركىندىگى" بولۋى كەرەك ەكەنىن ايتىپ، ايماقتا جاتتىعۋلارىن ۇنەمى وتكىزەدى. ال، بۇل – بەيجىڭنىڭ اشۋىن تۋدىرادى، ويتكەنى جۇڭگو تايۆان مەن ونىڭ اينالاسىنداعى تەڭىز ايماعىن جانە وڭتۇستىك جۇڭگو تەڭىزىنىڭ بارلىعىن تالاپ ەتەدى.
اقش پەن باسقا دا كوپتەگەن ەلدەر بۇل جەرلەردى بارلىق كەمەلەر ءۇشىن اشىق حالىقارالىق ايماق رەتىندە قاراستىرادى.
سوڭعى ۋاقىتقا دەيىن ۆاشينگتون تايۆان بۇعازى ارقىلى بەيجىڭگە قارسى شىققان نەگىزگى كۇش بولدى.
كانادا، فرانسيا جانە اۆستراليانىڭ اسكەري كەمەلەرى سوڭعى جىلدارى تايۆان بۇعازى ارقىلى ءجۇزىپ ءوتىپ، قىتايدىڭ نارازىلىعىن تۋدىردى.
23 ميلليون حالقى بار تايۆان بيلىگى اۆتوريتارلى قىتايدىڭ ۇنەمى باسىپ الۋ ءقاۋپى استىندا ءومىر سۇرەتىنىن ايتادى، ويتكەنى بەيجىڭ قاجەت بولعان جاعدايدا ءتايۆاندى ءبىر كۇندە-اق باسىپ الاتىنىن جاريالاعان.
بىلتىر قىتايدىڭ اسكەري ۇشاقتارى تايۆاننىڭ قورعانىس ايماعىنا 380 رەت شابۋىل جاساعان، ال وسى جىلدىڭ سەگىز ايىنداعى شابۋىل سانى 400-دەن اسقان.
پىكىر قالدىرۋ