الماتىداعى سوت ورىنداۋشىسىن سوققىعا جىققان ماقسوت ىسقاقوۆ ەسىمدى ازامات مۇنداي ارەكەتكە امالسىزدان بارعانىن ايتادى. 

ماقسۇت ىسقاقوۆتىڭ سوزىنشە، ول ءبىر اپتا بۇرىن ءۇيى بار ساياجاي ۋچاسكەسىن ساتىپ العان. مۇلىكتى ساتىپ الۋ بارىسىندا ۇيگە قاتىستى ەشقانداي قيىندىق بولمايتىنىنا كوز جەتكىزگەن. كوتتەدجدى ساتىپ العاندا سوت شەشىمى تۋرالى بىلمەگەن. 

– 4 قازان كۇنى، ءوزىن سوت ورىنداۋشىسىمەن دەپ تانىستىرعان ءادىل ەرمەكوۆ جانە ءبىر جاس جىگىت كەلدى. ولار ماعان ورىنداۋ پاراعىن كورسەتتى. مەن قۇجاتتى قاراپ، بورىشكەر رەتىندە مەن ەمەس، مۇلدەم باسقا تۇلعانىڭ ءاتى-جونى كورسەتىلگەنىن ايتتىم. مەن ءۇيدى زاڭدى تۇردە ساتىپ الدىم. قۇجاتتىڭ ءبارى بار. ماعان جانە مەنىڭ مۇلىگىمە قاتىستى سوت شەشىمى بولعان جوق ەكەنىن ايتتىم. ءبىراق ولار مەنى تىڭداعىلارى كەلمەدى، –  دەدى ماقسوت ىسقاقوۆ.

ماقسوت بىردەن وقيعا ورنىنا پوليسيا قىزمەتكەرلەرىن شاقىرعانىن، الدىمەن وقيعا ورنىنا پاترۋلدەر، سودان كەيىن ۋچاسكەلىك پوليسيا قىزمەتكەرى كەلگەنىن ايتتى.

– مەن ولارعا سوت شەشىمى جوق ەكەنىن ايتتىم. سول كەزدە سوت ورىنداۋشىسى مەن ونىڭ كومەكشىلەرى مەنىڭ ءۇيىمنىڭ اۋماعىنا كىرىپ كەتتى. ولار مەنىڭ قورشاۋىم مەن شاتىرىمدى بۇزۋعا تىرىستى. مەن پوليسيا قىزمەتكەرلەرىنەن مەنىڭ اۋماعىمنان بوتەن ادامداردى شىعارۋدى ءوتىندىم. ولاردىڭ جۇمىسىنا كەدەرگى جاساۋعا تىرىستىم، ءبىراق ولار مەنى يتەرىپ، قولدارىمدى بۇراي باستادى. مەندە بۇعان دالەل بار، مەن مەديسينالىق تەكسەرۋدەن ءوتتىم، – دەدى ول. 

ىسقاقوۆ سوت ورىنداۋشىسى تاراپىنان دورەكىلىك كورسەتىلگەننەن كەيىن كۇش قولدانۋعا ءماجبۇر بولدىم دەيدى. 

– مەنى "ءۇش ارىپكە" جىبەرگەندە، ءوزىمدى ۇستاي الماي قالدىم. سونىمەن قاتار، شاراسىز بولدىم. پوليسيا قىزمەتكەرلەرى ماعان كومەكتەسۋگە تىرىسپادى. ماعان قارسى 10 ادام بولدى، سودان كەيىن مەنىڭ وكىلدەرىم كەلدى. مەن كەزەكشى پروكۋروردى شاقىردىم، ءبىراق  ول كەلۋدەن باس تارتتى. سودان كەيىن وقيعا ورنىنا ءاىىب باسشىسىنىڭ ورىنباسارى كەلدى، – دەدى ماقسوت. 

ءۇي يەسى بوكسشى جانقوش تۇراروۆتىڭ قاقتىعىسقا قاتىسۋى تۋرالى دا تۇسىنىك بەردى. ونىڭ ايتۋىنشا، تۇراروۆ وسى ءۇيدىڭ بۇرىنعى يەسىنىڭ تۋىسى بولعان. وسى كەزدە ونىڭ تاتەسى ۇيدە بولعان. الايدا بوكسشى  كۇش قولدانباعان جانە قاقتىعىسقا بەلسەندى قاتىسپاعان. 

ىسقاقوۆ ءوز كەزەگىندە پوليسياعا جەكە سوت ورىنداۋشىسى مەن ونىڭ كومەكشىلەرىنىڭ ارەكەتتەرىنە ارىز جازعان. ول ءوزىن كىنالى دەپ سانامايدى.