اقتوبە قالاسىنىڭ تۇرعىنى بالاسىن گرانتقا وقۋعا تۇسىرمەك بولىپ، 1 ميلليون 300 مىڭ تەڭگە اقشاسىنان ايىرىلىپ قالعان، دەپ حابارلادى Polisia.kz سايتى.

29 قىركۇيەكتە اقتوبە قالاسىنىڭ 40 جاستاعى تۇرعىنى پوليسياعا الاياقتىق ارەكەتتىڭ قۇربانى بولعانى تۋرالى ارىزدانادى.

ءوتىنىش بەرۋشىنىڭ ايتۋىنشا، 2 شىلدە كۇنى ول قالانىڭ ەسكى بولىگىندە ورنالاسقان ءدامحانادا الدىن الا كەلىسىم بويىنشا بەيتانىس ايەلمەن كەزدەسكەن. كۇدىكتى قالا ۋنيۆەرسيتەتتەرىنىڭ بىرىنە "اقىسىز بولىمگە" وقۋعا تۇسۋگە كومەكتەسەتىنىن ايتىپ، كورسەتىلگەن قىزمەت ءۇشىن 1 300 000 تەڭگە كولەمىندە سىياقى العان.

شاعىمدانۋشىنىڭ ارىزى بويىنشا كۇدىكتى تۇلعاسى انىقتالىپ، ۇزاماي ۇستالعان.

بۇعان دەيىن ازىلكەش تۇرسىنبەك قاباتوۆتىڭ قىزى ۇبت-داعى زاڭعا قايشى ارەكەتى ءۇشىن تەست تاپسىرۋدان شەتتەتىلگەنى حابارلانعان.