«Nur Otan» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك تۇركىستان وبلىسىندا ءوتىپ جاتقان «Jastar – Otanga» حالىقارالىق فورۋمىنىڭ الاڭىندا «مەنىڭ ەلىم، مەنىڭ ءتىلىم» قوزعالىسىنا قاتىستى پىكىر ءبىلدىردى.
باۋىرجان بايبەك اتاپ وتكەندەي، ەلدىڭ تۇڭعىش پرەزيدەنتى نۇرسۇلتان نازاربايەۆ تاۋەلسىزدىكتىڭ 30 جىلى ىشىندە قازاقستاندا قوعامدىق كەلىسىم مەن ۇلتتىق بىرلىكتىڭ بىرەگەي مودەلىن قالىپتاستىردى. ەلباسى باعىتىنىڭ ساباقتاستىعىن ساقتاي وتىرىپ، «Nur Otan» قوعامدا، اسىرەسە جاستار اراسىندا ءوزارا قۇرمەت پەن بارشا ازاماتتىڭ تەڭدىگى قۇندىلىقتارىن نىعايتۋدى جالعاستىرىپ كەلەدى.
«قازاقستاندا «ەتنيكالىق ازشىلىق» جانە «دياسپورا» دەگەن ۇعىمدار جوق، بارلىعىنىڭ قۇقىقتارى مەن مىندەتتەرى بىردەي. بۇل – ەلباسى ساياساتىنىڭ ماڭىزدى جەتىستىكتەرىنىڭ ءبىرى. ەل پرەزيدەنتى قاسىم-جومارت توقايەۆ وسى باعىتتى ءارى قاراي جالعاستىرۋدا. كەلىسىم مەن بىرلىك – مەملەكەتتىڭ تۇراقتى دامۋى جانە بارلىق ازاماتتىڭ ءومىرىن جاقسارتۋ ءۇشىن قاجەتتى ءبىزدىڭ قوعامداعى باستى قۇندىلىقتار. سوندىقتان تىلدىك قىسىم كورسەتىلدى دەگەن تاقىرىپتاعى جاريالانىمدار جۇمسارتىپ ايتقاندا، قازاقستاندىقتاردىڭ تۇسىنبەۋشىلىگىن تۋعىزادى. ءبارىمىز – قازاقستان ازاماتىمىز. ال قازاق ءتىلى ءبىزدى بىرىكتىرەدى. جاقىندا عانا قوعام بەلسەندىلەرى ىسكە قوسقان «مەنىڭ ەلىم، مەنىڭ ءتىلىم» قوزعالىسى – وسىنىڭ ناقتى دالەلى. وعان ياكوۆ فەدوروۆ، مارينا شاپوۆالوۆا، اسكەر پيرييەۆ، مارينا ساحاروۆا، الەكسەي لودوچنيكوۆ سىندى باسقا دا كوشباسشى جاستار باستاماشى بولدى. بۇل قوزعالىس بۇكىل قوعامعا جاستاردىڭ زەردەلىلىگى مەن ولاردىڭ وتانىمىزدىڭ بولاشاعى ءۇشىن جاۋاپكەرشىلىگىنىڭ زور ەكەنىن كورسەتتى دەپ ويلايمىن. «Nur Otan» قازاقستان حالقى اسسامبلەياسىمەن بىرلەسىپ، ازاماتتىق بىرەگەيلىككە، باي تاريحي تامىردى، ۇلتتىق مادەنيەت پەن رۋحاني داستۇرلەردى ساقتاۋ مەن دامىتۋعا نەگىزدەلگەن قازاقستاندىق ءپاتريوتيزمدى ودان ءارى دامىتا بەرەدى»، – دەپ اتاپ ءوتتى ول.
بيلەۋشى پارتيا ءتوراعاسىنىڭ ءبىرىنشى ورىنباسارى بۇگىندە ءاربىر ءۇشىنشى قازاقستاندىقتىڭ 30 جاستان اسپاعانىن، سوندىقتان جاستاردى جان-جاقتى قولداۋ «Nur Otan»-نىڭ جانە «Jas Otan» جاستار قاناتىنىڭ باستى باعىتتارىنىڭ ءبىرى ەكەندىگىن اتاپ ءوتتى.
«بۇگىندە جاسوتاندىقتار ءماجىلىس پەن ءماسليحات سايلاۋىنىڭ قورىتىندىسى بويىنشا «Nur Otan»-نىڭ 616 جاس دەپۋتاتىنان تۇراتىن كورپۋس جاساقتاپ ۇلگەردى. بۇل ەلباسىنىڭ باستاماسىمەن قولعا الىنعان بيلەۋشى پارتيانىڭ سايلاۋالدى تىزىمىندەگى 20%-تىك جاستار كۆوتاسىنىڭ ارقاسىندا مۇمكىن بولىپ وتىر. ەل پرەزيدەنتى ق.ق.توقايەۆ ءوزىنىڭ ساياسي رەفورمالارىندا جاستار كۆوتاسىن بارلىق پارتيالاردىڭ سايلاۋالى تىزىمدەرى ءۇشىن مىندەتتى ەتىپ بەكىتتى. جاستاردى جۇيەلى قولداۋ ماقساتىندا كەڭ كولەمدە جۇرگىزىلگەن كوپشىلىك تالقىلاۋدان كەيىن جاسوتاندىقتار 2025 جىلعا دەيىنگى «جاستار-وتانعا!» باعدارلاماسىن قابىلدادى. ول بۇگىندە پارتيامىزدىڭ ەرەكشە باقىلاۋىندا»، – دەپ اتاپ ءوتتى باۋىرجان بايبەك.
پىكىر قالدىرۋ