ۇلتتىق بانك ءتوراعاسى ەربولات دوسايەۆ قازاقستاننىڭ 13 وبلىسىندا جىلدىق ينفلياسيا جىلدام ءوسىپ جاتقانىن ايتتى.

– كوكونىس باعاسىنىڭ 8،7%-عا جانە جەمىس باعاسىنىڭ 2،4%-عا ماۋسىمدىق تومەندەۋىنە قاراماستان، قازاقستاندا ينفلياسيا 8،9%-عا جەتىپ، جىلدامداۋىن جالعاستىردى، –  دەدى دوسايەۆ ۇكىمەت وتىرىسىندا.

ايتۋىنشا، مونەتارلىق ەمەس فاكتورلاردى تۇراقتاندىرۋ ءۇشىن بيىل قىركۇيەكتە ۇكىمەت اكىمدەرمەن بىرلەسىپ ينفلياسياعا قارسى دەن قويۋ شارالارى كەشەنىن ىسكە اسىرا باستاعان. سونىڭ ناتيجەسىندە الەۋمەتتىك ماڭىزدى ازىق-تۇلىك تاۋارلارى باعاسى تامىزداعى ەڭ جوعارى 10،4%دان قىركۇيەكتە 9،6%-عا دەيىن تومەندەگەن.

الايدا قازاننىڭ ءبىرىنشى اپتاسىنىڭ قورىتىندىسى بويىنشا باعا تاعى دا ءوسىپ، جىل باسىنان بەرى 9،9%-دى قۇرادى. الەۋمەتتىك ماڭىزدى ازىق-تۇلىكتىڭ قىمباتتاۋىنا جۇمىرتقا، تاۋىق ەتى، قىرىققابات، قانت پەن سيىر ەتى باعاسىنىڭ ءوسۋى اسەر ەتكەن.

– قىركۇيەكتە ديزەل وتىنىنىڭ باعاسى 3،8%-عا ءوستى، ال جەكەلەگەن وبلىستاردا 10%-دان استى. ءوندىرىستىڭ ۇلعايۋى مەن ەكسپورتتىڭ توقتاۋىنا قاراماستان، ديزەل وتىنىنىڭ تاپشىلىعى بايقالۋدا. بۇل ينفلياسيالىق قىسىمدى كۇشەيتىپ، باسقا تاۋارلارعا جاناما اسەر ەتىپ جاتىر، – دەدى دوسايەۆ.

ۇلتتىق بانك ءتوراعاسى وتكەن ايدا 17 ءوڭىردىڭ 13-ىندە جىلدىق ينفلياسيا جەدەلدەگەنىن مالىمدەدى. التى وبلىستا ينفلياسيا 9%-دان اسقان.

دوسايەۆ ينفلياسيانى "ۇستاپ تۇرۋ" ءۇشىن وڭىرلىك نارىقتاردا باعانى تۇراقتاندىرىپ، تاۋارلار تاپشىلىعىنا جول بەرمەۋ كەرەك ەكەنىن ايتتى.