شىمكەنت قالاسى پوليسيا دەپارتامەنتىنىڭ باستىعى ەرالى جۋماحانبەتوۆتىڭ باستاماسىمەن قالاداعى بارلىق مەكتەپتىڭ الدىندا يۋۆەنالدى پوليسيا قىزمەتكەرلەرى ءۇش اۋىسىمدى كەزەكشىلىككە تۇرادى.
ونداعى ماقسات - بالالاردىڭ قاتىسۋىمەن بولاتىن جول-كولىك وقيعالارىنىڭ الدىن الۋ. مەكتەپ اۋماعىندا قۇقىقتىق ءتارتىپتى قامتاماسىز ەتۋ، اۆتوكولىك جۇرگىزۋشىلەرىنىڭ، اسىرەسە مەكتەپ ماڭىندا، جول قوزعالىسى ەرەجەلەرىن بۇزۋعا جول بەرمەۋ دەيدى ءتارتىپ ساقشىلارى. ساقتىق شارالارى تۋرالى ارىپتەسىم ماقپال رىسبايەۆا باياندايدى.
1 قىركۇيەكتەن باستاپ پوليسيا دەپارتامەنتىنىڭ قىزمەتكەرلەرى قالا مەكتەپتەرىنىڭ ماڭىندا تاباننان تىك تۇرىپ، وقۋشىلاردىڭ قاۋىپسىزدىگىن قامتاماسسىز ەتەدى. وزدىگىنەن جولدان وتە المايتىن كىشكەنتاي بالعىندارعا پوليسەيلەر كومەككە كەلەدى. تۇرعىندار جول بويىندا كەزەكشىلىكتىڭ ۇيىمداستىرىلۋى مەكتەپكە بالالارىن تاسي المايتىن جۇمىسباستى اتا-انالار ءۇشىن ءتيىمدى دەيدى.
جولعا جاقىن ورنالاسقان ءبىلىم وشاقتارى اۋماعىندا جول بەلگىلەرىنىڭ ورنالاسۋى، رەتتەۋ تاڭبالارى مەن قۇرالداردىڭ ساپاسى دا ەرەكشە نازاردا. ءتارتىپ ساقشىلارى مەكتەپ ماڭايلارىندا 3 اۋىسىممەن كەزەكشىلىككە شىعادى.
نۇرلان ەرمەكبايەۆ، شىمكەنت قالاسى جول پوليسياسى قىزمەتى باسقارماسىنىڭ ينسپەكتورى
- جاسوسپىرىمدەردىڭ جانە جاياۋ جۇرگىنشىلەردىڭ جولدا ءجۇرۋ قاۋىپسىزدىگىن قامتاماسىز ەتۋ جانە ولارعا جولدا ءجۇرۋ ەرەجەلەرىن ءتۇسىندىرۋ ماقساتىندا، كۇندەلىكتى تاڭعى ساعات 07:30-08:30، تۇسكى ساعات 12:30-14:30 جانە كەشكى ساعات 17:30-19:30 ۋاقىت ارالىعىندا مەكتەپ ينسپەكتورلارى مەن پاترۋلدىك پوليسيا قىزمەتكەرلەرى قالا اۋماعىنداعى بارلىق مەكتەپتىڭ ماڭىنداعى جولداردان وقۋشىلاردىڭ ءقاۋىپسىز ءوتۋىن قامتاماسىز ەتۋ باعىتىندا قىزمەت اتقارادى.
ايتا كەتەيىك، قالادا 23-31 تامىز ارالىعىندا «ابايلاڭىز، بالالار» اتتى جەدەل پروفيلاكتيكالىق ءىس-شاراسى وتكەن بولاتىن. شارا كەزىندە ءتارتىپ ساقشىلارى جول ءجۇرۋ ەرەجەلەرىن بۇزۋعا 7 مىڭنان استام ءجايتتى انىقتاعان. مەكتەپ ماڭىنداعى كوشەلەردە 140 جول بەلگىلەرى ورناتىلىپ، 15 جاساندى جول كەدەرگىلەرى قويىلىپتى.
پىكىر قالدىرۋ