شىمكەنتتە پاراقورلىق پەن جىمقىرۋ فاكتىلەرى بويىنشا قۇقىق قورعاۋ، قۇرىلىس جانە ءبىلىم سالاسى كوش باستاپ تۇر. ودان كەيىن دەنساۋلىق، سالىق جانە جەر قاتىناستارى تىزىمدە بار. بۇل تۋرالى سىبايلاس جەمقورلىققا قارسى ءىس-قيمىل اگەنتتىگىنىڭ شىمكەنت قالاسى بويىنشا دەپارتامەنتى باسشىسىنىڭ ءبىرىنشى ورىنباسارى تالعار سەرىكبايەۆ ايتتى. سونداي-اق، ول بيىلعى 8 ايداعى سالا قىزمەتىنىڭ ناتيجەلەرىمەن ءبولىستى.

اتقارىلعان جۇمىستارمەن تانىستىرعان دەپارتامەنت باسشىسىنىڭ ءبىرىنشى ورىنباسارى جىل باسىنان بەرى 63 قىلمىس انىقتالعانىن اتاپ ءوتتى. ولاردىڭ 45ء-ى سىبايلاس جەمقورلىق سيپاتىندا. جىمقىرۋ فاكتىلەرى بويىنشا – 17، پاراقورلىق بويىنشا 30 قىلمىس تىركەلگەن.

سونداي-اق، تالعار سەرىكبايەۆ پارا الۋ، بەرۋ فاكتىسىنىڭ جولىن كەسۋگە ىقپال ەتكەن ازاماتتارعا ارنايى سىياقى قارالاتىندىعىن جەتكىزدى. ول ءۇشىن، 1424 كولل ورتالىعى جۇمىس ىستەيدى. ماسەلەن، بۇعان دەيىن سىبايلاس جەمقورلىقتىڭ الدىن العان 11 شىمكەنتتىك تۇرعىنعا 2 ميلليون تەڭگە شاماسىندا سىياقى بەرىلگەن.

قازىرگى تاڭدا دەپارتامەنت تاراپىنان بيزنەس پەن ينۆەستورلاردى قورعاۋ جوباسى ىسكە اسىرىلۋدا. سوندىقتان، كەز كەلگەن كاسىپكەرلىك وبەكتىسى مەملەكەتتىك ورگاندار تاراپىنان قىسىم كورگەن جاعدايدا دەپارتامەنتكە جۇگىنۋىنە بولادى. ايتىپ وتەيىك، جىل باسىنان بەرى قالا تۇرعىندارىنان دەپارتامەنتكە 1083 ارىز-شاعىم ءتۇسىپ، ءتيىستى شارالار اتقارىلعان.