قازاقستاننىڭ باس سانيتار دارىگەرى ەرلان قياسوۆ كوروناۆيرۋس ينفەكسياسىنىڭ الدىن-الۋ ماقساتىندا جاڭا قاۋلى جاريالادى.

قاۋلىعا سايكەس، ەلدەگى وبلىستار، نۇر-سۇلتان، الماتى، شىمكەنت قالالارىنىڭ اكىمدەرىنە 12-دەن 18 جاسقا دەيىنگى جاسوسپىرىمدەردى، جۇكتى ايەلدەردى جانە لاكتاسيا كەزەڭىندەگى ايەلدەردى كوروناۆيرۋسقا قارسى ۆاكسيناسيالاۋدى ۇيىمداستىرۋ تاپسىرىلدى. 

سونداي-اق 2021 جىلعى 1 قاراشاعا دەيىن "كوميرناتي" (پفايزەر، اقش) ۆاكسيناسىن قولدانا وتىرىپ، كۆي-گە قارسى ۆاكسيناسيالاۋدى ۇيىمداستىرۋ جانە جۇرگىزۋ بويىنشا اۋداندىق، قالالىق جانە وبلىستىق دەڭگەيلەردە مەديسينا قىزمەتكەرلەرىن وقىتۋ ۇيىمداستىرىلۋعا ءتيىس.

ادىستەمەلىك ۇسىنىمداردى كۆي-گە قارسى ۆاكسيناسيالاۋدى ۇيىمداستىرۋعا جانە جۇرگىزۋگە تارتىلعان بارلىق مەديسينا قىزمەتكەرلەرىنىڭ نازارىنا جەتكىزە وتىرىپ، دەنساۋلىق ساقتاۋ جۇيەسىنىڭ بارلىق دەڭگەيلەرىندە جۇمىس توپتارى قۇرىلۋى كەرەك؛

• مەديسينالىق ۇيىمدار ءۇشىن «كوميرناتي» ۆاكسيناسىن ساقتاۋ جانە پايدالانۋ ماسەلەلەرى بويىنشا ستاندارتتى وپەراسيالىق راسىمدەردى دايىنداۋ قامتاماسىز ەتىلۋى كەرەك.

قاۋلى 21 قازاننان باستاپ قولدانىسقا ەنەدى.