شىمكەنت قالاسىندا جىل باسىنان بەرى مەملەكەتتىك تۇرعىن ءۇي باعدارلامالارى اياسىندا 3 مىڭعا جۋىق وتباسى باسپانامەن قامتىلعان.

- جىل سايىن كەزەكتە تۇرعان ازاماتتارعا پاتەرلەر بەلگىلەنگەن تارتىپپەن ۇلەستىرىلىپ كەلەدى. وسى جىلدىڭ باسىنان تۇرعىن ءۇي كەزەگىندە تۇرعان 682 وتباسى ارەندالىق پاتەرمەن قامتىلعان بولسا، جىل سوڭىنا دەيىن وسى باعىتتا 294 وتباسىعا باسپانا بەرىلەدى، - دەدى تۇرعىن ءۇي باسقارماسىنىڭ باسشىسى ا.رىسجانوۆ ءوزىنىڭ اكىمگە بەرگەن 9 ايلىق ەسەپ قورىتىندىسى كەزىندە.

«وتباسى بانك» ارقىلى «5-20-25» باعىتى بويىنشا كرەديتتىك تۇرعىن ۇيمەن 730 ازامات قامتىلعان. ونىڭ ىشىندە 261 ازامات تۇرعىن ءۇي كەزەگىندە تىركەلگەندەر. شىمكەنت قالاسىنداعى ەكىنشى دەڭگەيلى بانكتەر ارقىلى جىل باسىنان بەرى 1362 ازامات نەسيە ارقىلى راسىمدەي وتىرا باسپانالى بولدى. جىل سوڭىنا دەيىن كرەديتتىك تۇرعىن ۇيمەن 4 413 وتباسىنى قامتۋ جوسپارلانۋدا.

«2-10-20 «باقىتتى وتباسى» باعدارلاماسى اياسىندا 158 وتباسى نەسيە نەگىزىندە تۇرعىن ۇيمەن قامتىلىپ، ونىڭ ىشىندە 73 وتباسىعا العاشقى جارناسىنىڭ ءبىر بولىگىن جابۋعا تۇرعىن ءۇي سەرتيفيكاتى بەرىلدى. الداعى ۋاقىتتا دا بۇل جۇمىستار جالعاسىن تابادى.

تابىس كورسەتكىشى از تۇرعىنداردى قولداۋ ماقساتىندا جەرگىلىكتى بيۋجەت ەسەبىنەن الداعى جىلعا 500 ملن. تەڭگەگە تۇرعىن ءۇي سەرتيفيكاتتارىن الەۋمەتتىك كومەك رەتىندە قايتارىمسىز بەرۋ قاراستىرىلعان. قايتارىمسىز تۇرعىن ءۇي سەرتيفيكاتى بويىنشا 902 ءوتىنىم قابىلدانا وتىرىپ، 311 ءوتىنىم – 274 ملن.تەڭگەگە ماقۇلدانعان.

شىمكەنت قالاسىنىڭ اقپاراتتىق-كوممۋنيكاسيالىق ورتالىعى