عالىم، فيلولوگيا عىلىمىنىڭ دوكتورى، پروفەسسور، اكادەميك سەرىك قيرابايەۆ ومىردەن ءوتتى. قارالى حاباردى اقىن سەرىكزات دۇيسەنعازى جەتكىزدى.

"كورنەكتى ادەبيەتتانۋشى عالىم، سىنشى، اكادەميك سەرىك قيرابايەۆ اعايىمىز دۇنيەدەن وزدى. اللا الدىنان جارىلقاسىن!" دەلىنگەن اقىننىڭ الەۋمەتتىك جەلىدەگى جازباسىندا.

سەرىك سمايىل ۇلى قيرابايەۆ 1927 جىلى 23 ناۋرىزدا قاراعاندى وبلىسى، جاڭارقا اۋدانى، اتاسۋ اۋىلىندا تۋعان.

1952–1955 جىلدارى "پيونەر" جۋرنالىندا رەداكتور، 1955–1958 جىلدارى "سوسياليستىك قازاقستان" گازەتىندە مەڭگەرۋشى، رەداكسيالىق القا مۇشەسى بولدى. 1958 جىلدان اباي اتىنداعى قازاق پەداگوگيكالىق ينستيتۋتىندا 30 جىل بويى دوسەنت، پروفەسسور، فيلولوگيا فاكۋلتەتىنىڭ دەكانى، قازاق ادەبيەتى كافەدراسىنىڭ مەڭگەرۋشىسى، ينستيتۋت رەكتورىنىڭ وقۋ ءىسىن باسقاراتىن ورىنباسارى قىزمەتتەرىن اتقاردى.

قازاق كسر عىلىم اكادەمياسىنىڭ اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى، كەيىننەن ءبولىم مەڭگەرۋشىسى بولىپ ىستەدى. فيلولوگيا عىلىمىنىڭ دوكتورى، پروفەسسور، كسرو پەداگوگيكا عىلىمدارى اكادەمياسىنىڭ كوررەسپوندەنت-مۇشەسى، ق ر ۇعا-نىڭ اكادەميگى، قازاقستان جانە قىرعىزستان رەسپۋبليكالارى عىلىمىنىڭ ەڭبەك سىڭىرگەن قايراتكەرى، قازاقستان رەسپۋبليكاسى مەملەكەتتىك سىيلىعىنىڭ يەگەرى.

ەڭبەك قىزىل تۋ، حالىقتار دوستىعى وردەندەرىمەن، كوپتەگەن مەدالدارمەن، قازاق كسر جوعارعى كەڭەسىنىڭ قۇرمەت گراموتاسىمەن ماراپاتتالعان. "قازاقستاننىڭ ەڭبەك سىڭىرگەن قايراتكەرى"، "وتان" وردەنىنىڭ يەگەرى.

1951 جىلى اباي اتىنداعى قازاق پەداگوگيكالىق ينستيتۋتىن بىتىرگەننەن كەيىن اسپيرانتۋرادا وقي ءجۇرىپ، قازاقتىڭ مەملەكەتتىك كوركەم ادەبيەت باسپاسىنىڭ اعا رەداكتورى، "ادەبيەت جانە يسكۋسستۆو" جۋرنالىنىڭ ءبولىم مەڭگەرۋشىسى بولىپ ىستەگەن.