بۇگىن شىمكەنت قالاسى تۋريزم جانە سىرتقى بايلانىستار باسقارماسىنىڭ باسشىسى ەرلان قىدىروۆ باسقارما تاراپىنان 9 ايدا اتقارىلعان جۇمىستار بويىنشا باسپا ءسوز ءماسليحاتىن وتكىزدى. قازىرگى تاڭدا شىمكەنت قالاسى تۋريزم جانە سىرتقى بايلانىستار باسقارماسى ماركەتينگتىك ىلگەرىلەتۋ، تۋريستىك ينفراقۇرىلىمدى جەتىلدىرۋ، «كرەاتيۆتى يندۋستريانى» دامىتۋ، سىرتقى بايلانىستاردى دامىتۋ جانە ىنتىماقتاستىقتى نىعايتۋ سەكىلدى 4 باعىتتا جۇمىس جاساۋدا.

ەرلان ەرمەك ۇلى ءوز سوزىندە شىمكەنت قالاسىنىڭ قازىرگى تاڭدا قازاقستاننىڭ 8 وڭىرىمەن جانە 4 حالىقارالىق باعىتتا تىكەلەي اۋە قاتىناسى بار ەكەنىن اتاپ ءوتتى.
اعىمداعى جىلدىڭ 6 اي قورىتىندىسى بويىنشا قالامىزعا 158 224 تۋريست كەلگەن. سايكەسىنشە، قالا ەكونوميكاسىنا تۇسكەن تابىس كولەمى 9،5 ملرد. تەڭگەنى قۇراعان. جىل سوڭىنا دەيىن بۇل كورسەتكىشتى 2 ەسەگە ارتتىرۋ، ياعني 19 ملرد. تەڭگەگە جەتكىزۋ جوسپارلانىپ وتىر. ال، بىلتىر شىمكەنت قالاسىنا كەلۋشى تۋريست سانى 213 394 ادامدى قۇراپ، تۋريزم سالاسىنان قالا ەكونوميكاسىنا تۇسكەن تابىس كولەمى 12،8 ملرد. تەڭگەگە جەتكەن بولاتىن.

ءۇشىنشى مەگاپوليستىڭ كورىكتى جەرلەرىمەن تانىستىرۋ ماقساتىندا قاڭتار ايىندا اشىلعان «Visit Shymkent» تۋريستىك-اقپاراتتىق ورتالىعى جىل باسىنان بەرى ازىرلەنگەن 17 مارشرۋت بويىنشا 115 تەگىن ەكسكۋرسيا ۇيىمداستىرىپ، 11 مىڭعا جۋىق تۋريستكە قىزمەت كورسەتتى. ورتالىق بازاسىندا قالاداعى حالىق كوپ شوعىرلاناتىن نۇكتەلەردە 7 اقپاراتتىق كيوسك ورنالاستىرىلعان. ال، تۋريستەردى اقپاراتپەن قامتاماسىز ەتۋ ماقساتىندا ىسكە اسقان VISIT-SHYMKENT.KZ تۋريستىك پورتالى مەن ءموبيلدى قوسىمشاسىنا قازىرگى تاڭدا قالا اۋماعىنداعى 700-دەن اسا تۋريستىك سالا وكىلدەرى مەن نىساندارى ەنگىزىلىپ، پورتال ارقىلى ءتۇرلى مادەني نىساندارعا 38 414 بيلەت ساتىپ الىنعان.

تۋريستىك سالانى دامىتۋ باعدارلاماسىنا سايكەس، شەتەلدىك تۋريستەردى تىركەۋ، ەسەپكە الۋ، تۋريستىك اعىندى تالداۋ جانە كوشى-قون باقىلاۋىن جۇزەگە اسىرۋعا باعىتتالعان «E-Qonaq» ەلەكتروندى جۇيەسى قازاقستان بويىنشا ىسكە قوسىلعان بولاتىن. بۇگىندە بۇل جۇيە شىمكەنت قالاسىنداعى 65 قوناق ۇيدە ورناتىلعان. باسقارما الداعى ۋاقىتتا قالانىڭ تانىمدىلىعىن ارتتىرىپ، تۋريستىك اعىندى ارتتىرۋ ماقساتىندا ءبىرقاتار جوبالاردى ىسكە اسىرماق.

شىمكەنت قالاسىنىڭ اقپاراتتىق-كوممۋنيكاسيالىق ورتالىعى