"قازگيدرومەت" سينوپتيكتەرى قاراشاعا ارنالعان اۋا رايى بولجامىن جاريالادى.

سينوپتيكتەر بولجامىنشا، ءبىرىنشى 10 كۇندىك باسىندا قازاقستاننىڭ سولتۇستىگىندە، شىعىسىندا جانە ورتالىعىندا، 3 قاراشادان باستاپ ەلدىڭ وڭتۇستىك وڭىرلەرىندە، 10 كۇندىكتىڭ سوڭىندا رەسپۋبليكانىڭ سولتۇستىك-باتىس جارتىسىندا اتموسفەرالىق فرونتتار اسەرىنەن تۇمان، كوكتايعاق، جەل ەكپىنىنىڭ كۇشەيۋى (سولتۇستىك جارتىسىندا قارلى بوران) جاڭبىر جانە قار تۇرىندە جاۋىن-شاشىن كۇتىلەدى.

3-4 قاراشادا رەسپۋبليكانىڭ باسىم بولىگى قارا تەڭىز وڭىرلەرىنەن ىعىسقان اۋقىمدى سۋىق انتيسيكلون ىقپالىندا بولادى، اۋا تەمپەراتۋراسى تومەندەپ (باتىس وڭىرلەردى قوسپاعاندا)، اياز بولادى دەپ بولجانادى.

• قازاقستاننىڭ باتىسىندا تۇندە 0، +8 گرادۋستان -5 +2 گرادۋسقا دەيىن، كۇندىز +10 +18 گرادۋستان 0، +10 گرادۋسقا دەيىن؛
• رەسپۋبليكانىڭ سولتۇستىك-باتىس جارتىسىندا، ورتالىعىندا جانە شىعىسىندا تۇندە -5 +5 گرادۋستان -5 -15 گرادۋسقا دەيىن، شەتكى شىعىستا -20 گرادۋسقا دەيىن، كۇندىز +2 +8 گرادۋستان -3 -10 گرادۋسقا دەيىن؛
• رەسپۋبليكانىڭ وڭتۇستىگى مەن وڭتۇستىك-شىعىسىندا تۇندە -3 +5 گرادۋستان -1 -13 گرادۋسقا دەيىن، كۇندىز +10 +16 گرادۋستان -5 +3 گرادۋسقا دەيىن تومەندەيدى.

ءبىراق اي ورتاسىنان باستاپ تەمپەراتۋرا فونى بىرتىندەپ جوعارىلايدى دەپ كۇتىلەدى.

"ەكىنشى 10 كۇندىكتىڭ ءبىرىنشى جارتىسىندا قازاقستاننىڭ باسىم بولىگىندە اۋا رايى سولتۇستىك-باتىس سيكلون اسەرىنە قاراي انىقتالادى، سوندىقتان تۇراقسىز اۋا رايى كۇتىلەدى: جاۋىن-شاشىن بولادى (نەگىزىنەن، قار تۇرىندە)، ەكپىندى جەل سوعىپ، بۇرقاسىن بولادى. ودان كەيىن سۋىق اۋا ماسسالارىنا بايلانىستى ەكىنشى 10 كۇندىكتىڭ اياعىندا، ءۇشىنشى 10 كۇندىكتىڭ باسىندا جانە اياعىندا تەمپەراتۋرالىق فون تومەندەيدى دەپ كۇتىلەدى" دەلىنگەن "قازگيدرومەت"  حابارلاماسىندا.

رەسپۋبليكانىڭ سولتۇستىگىندە، سولتۇستىك-باتىسىندا، شىعىسىندا جانە ورتالىعىندا سۋىق كۇندەرى تەرمومەتر باعانى تۇندە -17 -25 گرادۋسقا دەيىن، كۇندىز -8 -13 گرادۋسقا دەيىن تومەندەيدى. رەسپۋبليكا بويىنشا، اۋا تەمپەراتۋراسى - تۇندە -5 -17 گرادۋسقا دەيىن، كۇندىز -2 -7 گرادۋسقا دەيىن تومەندەيدى.

كۇندىز ەلدىڭ سولتۇستىك جارتىسىندا اياز باسىلىپ، اۋا تەمپەراتۋراسى  +3+12 گرادۋسقا دەيىن جىلىنادى.