مۇقاعالي ماقاتايەۆتىڭ 90 جىلدىعىنا ارنالعان «مۇقاعالي» كوركەم ءفيلمىنىڭ پرەمەراسى قازاقستان بويىنشا العاش بولىپ شىمكەنت قالاسىندا ءوتتى.

«مۇقاعالي» كوركەم ءفيلمى ق ر مادەنيەت جانە سپورت مينيسترلىگىنىڭ تاپسىرىسى بويىنشا تۇسىرىلگەن. وندا اتى اڭىزعا اينالعان اقىن ءومىرىنىڭ سوڭعى جىلدارى تۋرالى باياندالادى. ءفيلمىنىڭ ءتۇسىرىلىمى 2019 جىلدىڭ جازىندا باستالدى. كوركەم تۋىندىنىڭ سيۋجەتى وتكەن عاسىردىڭ 50-70ء-شى جىلداردىن قامتيدى. رەجيسسەر بولات قالىمبەتوۆتىڭ ايتۋىنشا، ەسكى الماتىعا ۇقساس قالانى تابۋ ءۇشىن، ءتۇسىرىلىم توبى قازاقستاننىڭ تۇكپىر-تۇكپىرىن ارالاعان. ناتيجەسىندە شىعارماشىلق توپ ەسكى كوشەلەرى مەن ۇيلەرى جاقسى ساقتالعان وسكەمەن قالاسىن تاڭدادى.

نەگىزگى تۇسىرىلىمدەر وسكەمەن، الماتى، سانكت-پەتەربۋرگ قالالارىندا، سونداي-اق الماتى وبلىسىندا ءوتتى.

كوپتەگەن ۇمىتكەرلەر اراسىندا باستى رولگە ماحامبەت وتەمىسوۆ اتىنداعى اتىراۋ وبلىستىق دراما تەاترىنىڭ ءارتىسى، جاس اكتەر ابىلاي جانبالايەۆ بەكىتىلدى. سونداي-اق، كوركەم تۋىندىدان كورەرمەندەر نۇرعيسا تىلەندييەۆ، باۋىرجان مومىش ۇلى، فاريزا وڭعارسىنوۆا، لاشىن ءالىمجانوۆا سىندى ۇلى تۇلعالاردىڭ دا بەينەسىن بايقايتىن بولادى. ءفيلمنىڭ سەنارييىن بەلگىلى جازۋشى جۇسىپبەك قورعاسبەك، رەجيسسەر بولات قالىمبەتوۆ جانە عازيز ناسىروۆ جازعان.

پرەمەراعا زيالى قاۋىم وكىلدەرى، اقىن، جازۋشىلار، شىمكەنت قالاسىنىڭ قۇرمەتتى ازاماتتارى، كينورەجيسسەرلەر قاتىستى. شىمكەنتتىك كورەرمەن ءفيلمدى جاقسى قابىلدادى.