شىمكەنت قالاسى اكىمىنىڭ ورىنباسارى ەرعالي بىلىسبەكوۆ كەزەكتى رەت تۇرعىنداردى جەكە ماسەلەلەرى بويىنشا ونلاين قابىلدادى.
قابىلداۋ بارىسىندا تۇرعىن ءۇي، الەۋمەتتىك كومەك جانە سوت ورىنداۋشىسى تاراپىنان ەسەپ-شوتى بۇعاتتالعان تۇرعىنداردىڭ وتىنىشتەرى قاراستىرىلدى. وسى ماسەلەنىڭ ءمان-جايىن انىقتاپ، زاڭ جۇزىندە شەشۋ ماقساتىندا شىمكەنت قالاسى ادىلەت دەپارتامەنتىنىڭ مامانى دا قاتىستى. قابىلداۋ بارىسىندا ەلدەن شىعۋعا تىيىم سالىنعان بورىشكەردىڭ ماسەلەسى شەشىمىن تاپتى.
قالا اكىمىنىڭ ورىنباسارى ءار تۇرعىندى جەكە تىڭداپ، باسپانا ماسەلەسىن شەشۋ جولدارىن قاراستىردى. تۇرعىن ۇيگە مۇقتاج جانە اتا-اناسىنىڭ قامقورلىعىنسىز قالعان ەكى جاس تۇرعىن قابىلداۋ بارىسىندا تۇرعىن ءۇي سەرتيفيكاتى تۋرالى العاش ەسىتىپ وتىرعانىن جەتكىزدى. قالا اكىمدىگىنىڭ باستاپقى جارنا رەتىندە 1 ميلليون تەڭگەدەن قولداۋىنا قىزىعۋشىلىق تانىتىپ، الداعى ۋاقىتتا يپوتەكالىق باسپانانى قاراستىرۋعا بەل بۋماق. ويتكەنى، قالالىق تۇرعىن ءۇي باسقارماسىنىڭ مالىمەتىنشە ول جاستارعا ساناتتارى بويىنشا، زەينەتاقى اۋدارىمدارى مەن تولەم قابىلەتتىلىكتەرىنە سايكەس نەسيەلىك باسپاناعا قول جەتكىزۋگە بولادى.
ەرعالي داۋلەتبەك ۇلى سالا ماماندارىنا شىمكەنت قالاسى بويىنشا جالپى كەزەكتە تۇرعان تۇرعىن ۇيگە مۇقتاج جانە اتا-انا قامقورلىعىنسىز قالعان جاستار جونىندە تالداۋ جاساۋدى تاپسىردى. بۇل ساناتتاعى ازاماتتاردىڭ وزەكتى ماسەلەسىن ەگجەي-تەگجەيلى قاراستىرىپ، ناقتى شەشىمدەر قابىلداۋ قاجەت ەكەندىگىن باسا ايتتى.
پىكىر قالدىرۋ