شىمكەنت قالاسى اكىمىنىڭ ورىنباسارى ەرعالي بىلىسبەكوۆ «وتىرار» تەلەارناسىنىڭ «حالىق پەن بيلىك» باعدارلاماسىنا قاتىسىپ، تىكەلەي ەفير ارقىلى تۇرعىنداردىڭ سۇراقتارىنا جاۋاپ بەردى.

تۇرعىندار سۇراقتاردى تەلەارنانىڭ بايلانىس ءنومىرى مەن «Whats Aap» جانە «Instagram» جەلىلەرى ارقىلى جولدادى. ەفير بارىسىندا تۇرعىنداردان تۇسكەن وزەكتى ماسەلەلەردىڭ دەنى الەۋمەتتىك سالا مەن قالاداعى توزىعى جەتكەن ۇيلەرگە قاتىستى بولدى. تۇرعىندار توزىعى جەتكەن ۇيلەردىڭ الداعى كۇيىنە الاڭداۋلى.

–توزىعى جەتكەن ۇيلەر قازىرگى تاڭدا وزەكتى ماسەلە. ولاردى ءسۇرىپ، تۇرعىندارىن كوشىرۋ بويىنشا 2020-2025 جىلدارعا ارنالعان «نۇرلى جەر» مەملەكەتتىك باعدارلاماسى اياسىندا شىمكەنت قالاسىنىڭ تۇرعىن ءۇي قورىن رەنوۆاسيالاۋ باعدارلاماسى قابىلدانعان. الايدا، كوپ ادامدار ۇيرەنگەن جەرىنەن كوشۋگە كەلىسە بەرمەيدى. سول سەبەپتى ورتاق شەشىم قابىلداپ، حالىقتىڭ قامى ءۇشىن قۇرىلىس كەزىندە تۇرعىنداردى ۋاقىتشا باسپانامەن قامتاماسىز ەتۋ نەمەسە ورنىنا تەڭ پاتەرمەن قامتۋ شارالارى قاراستىرىلۋدا، -دەدى ەرعالي داۋلەتبەك ۇلى.

قازىرگى تاڭدا، قالادا 2 296 كوپپاتەرلى تۇرعىن ءۇي بار. ونىڭ ىشىندە وتكەن عاسىردىڭ 50-60-شى جىلدارىنا دەيىن سالىنعان 107 ءۇي تەحنيكالىق زەرتتەۋ قورىتىندىسى نەگىزىندە توزىعى جەتكەن كوپپاتەرلى تۇرعىن ءۇي رەتىندە سۇرۋگە ۇسىنىلعان. ە.بىلىسبەكوۆتىڭ سوزىنشە، بۇگىندە ارنايى باعدارلاما اياسىندا تۇرعىندار اراسىندا تۇسىندىرمە جۇمىستارى جۇرگىزىلىپ، «Shymkent» اكك» اق تاراپىنان بۇل ىسكە ينۆەستورلاردى تارتۋ جۇمىستارى دا جۇرگىزىلۋدە.

ءبىر ساعاتقا سوزىلعان ەفيردە اكىم ورىنباسارى ءوزى جەتەكشىلىك ەتەتىن تۇرعىن ءۇي، جۇمىسپەن قامتۋ جانە الەۋمەتتىك قورعاۋ، ەكونوميكا جانە بيۋدجەتتىك جوسپارلاۋ باسقارمالارىنىڭ جۇمىسىن قىسقاشا بايانداپ، كورەرمەندەردىڭ سۇراقتارىنا تولىق جاۋاپ بەرۋگە تىرىستى.

سونىمەن قاتار، اكىم ورىنباسارى ازاماتتاردى جەكە ماسەلەلەرى بويىنشا ونلاين قابىلدادى.

ايتا كەتەيىك، شىمكەنت قالاسى اكىمىنىڭ ورىنباسارى ەرعالي بىلىسبەكوۆ تۇرعىنداردى جەكە قابىلداۋى الدىن-الا جازىلۋ بويىنشا، اپتانىڭ بەيسەنبى جانە جۇما كۇندەرى ونلاين تۇردە قابىلدايدى.