شىمكەنت قالاسى بويىنشا ۇلتتىق حالىق ساناعىنا بۇگىنگى تاڭدا 235475 ادام ونلاين جۇيەدە قاتىستى. ۇلتتىق ستاتيستيكا بيۋروسىنىڭ شىمكەنت قالاسى بويىنشا دەپارتامەنتىنىڭ مالىمەتىنشە، وسىلايشا ءۇشىنشى مەگاپوليستە ونلاين ساناقتان وتكەندەردىڭ ۇلەسى 21،4 %-دى قۇراپ وتىر. ونىڭ ىشىندە sanaq.gov.kz سايتى ارقىلى 197273 ادام، e-gov پورتالى ارقىلى 26725 ادام جانە Aitu ءموبيلدى قوسىمشاسى ارقىلى 11477 ادام تىركەلگەن.

وتىرار تەلەارناسىنىڭ باعدارلاماسىندا تىكەلەي ەفير ارقىلى تۇرعىنداردىڭ سۇراقتارىنا جاۋاپ بەرگەن قالا اكىمىنىڭ ورىنباسارى ەرعالي بىلىسبەكوۆ حالىقتى ساناققا قاتىسۋدا بەلسەندىلىك تانىتۋعا شاقىردى.

– حالىق ساناعى قالانىڭ الداعى الەۋمەتتىك-ەكونوميكالىق دامۋ باعىتى ءۇشىن اسا ماڭىزدى. ماسەلەن، جول سالۋ، ءۇي قۇرىلىسى، اۋىز سۋ، گاز، جارىقپەن قامتاماسىز ەتۋ، مەكتەپ، بالا-باقشا مەن اۋرۋحانالار بويىنشا ينفراقۇرىلىمدى دامىتۋدا ساناقتىڭ ماڭىزى زور. وسىنىڭ بارلىعى حالىق سانىنا قاراي ەسەپتەلىپ، قارجىلاندىرىلاتىن دۇنيەلەر. وتباسىنىڭ جان باسىنا شاققانداعى قارجىلاندىرىلۋى دا وسى ساناق ناتيجەسىنە بايلانىستى. سول سەبەپتى بارشا تۇرعىنداردى جالپى ۇلتتىق ناۋقاندا بەلسەندىلىك تانىتۋعا شاقىرامىن، – دەدى قالا اكىمىنىڭ ورىنباسارى.

جالپى، ونلاين ساناقتان 15ء-شى قازانعا دەيىن sanaq.gov.kz سايتى ارقىلى وتۋگە بولادى. 1-30 قازان ارالىعىندا ساناق پەرسونالى ءۇي-ۇيدى ارالايدى. بۇگىندە شىمكەنت قالاسى بويىنشا 177 نۇسقاۋشىلىق جانە 1207 ساناق ۋچاسكىلەرى قۇرىلعان.

ۇلتتىق حالىق ساناعىن وتكىزۋگە قالالىق جۇمىسپەن قامتۋ ورتالىعىندا جۇمىسسىز رەتىندە تىركەلگەن 172 نۇسقاۋشى-باقىلاۋشى جانە 1184 ينتەرۆيۋەر، ستۋدەنتتەر مەن ەرىكتىلەر جانە وزگە دە نيەت بىلدىرگەن ازاماتتار جۇمىلدىرىلىپ وتىر.