شىمكەنت قالاسى قاراتاۋ اۋدانىندا سانيتارلىق تازالىق جۇمىستارى 10 اۋماق بويىنشا اتقارىلادى. اۋدانعا بەكىتىلگەن 4 مەردىگەر ۇيىم تاراپىنان 85 شاقىرىمدىق يرريگاسيالىق جۇيەلەر تازارتىلىپ، 10 مىڭ ءتۇپ اعاش كوشەتتەرى كۇتىمگە الىنعان. كوپقاباتتى تۇرعىن ءۇي اۋلالارىندا 74 قوقىس الاڭشاسىندا 245 قوقىس كونتەينەرى قويىلعان.

كوشەلەرگە قۇرىلىسقا قاجەتتى ماتەريالدارىن تاستاپ، قوزعالىسقا كەدەرگى كەلتىرگەن تۇرعىندارعا قاتىستى 80 حاتتاما تولتىرىلىپ، 1،6 ملن. تەڭگە ايىپپۇل وندىرىلگەن.

اۋلالاردىڭ تازا بولۋى كوپ جاعدايدا تۇرعىنداردىڭ وزدەرىنە بايلانىستى. تازالىق جۇمىستارىنىڭ تۇراقتى اتقارىلۋى ءۇشىن تۇرعىندار مەن تازالىق قامتاماسىز ەتۋشى ۇيىمدار اراسىندا قۇقىقتىق قاتىناس بولۋى قاجەت. بۇل باعىتتا تۇرعىن ءۇي قاتىناسىندا جاڭا باسقارۋ جۇيەسى ەنگىزىلگەن.

اۋدانداعى جالپى 384 كوپقاباتتى تۇرعىن ۇيدە 10 مۇلىك يەلەرىنىڭ بىرلەستىگى جانە 273 قاراپايىم سەرىكتەستىك قۇرىلدى. تۇرعىندار وسى جۇيە بويىنشا ءوز اۋلالارىنداعى تازالىق جۇمىستارىن قاداعالاۋعا مۇمكىندىك الدى.

اۋدان اكىمى ا.اليكۋلوۆتىڭ ەسەبىندە باياندالعان وسى ماسەلەلەرگە كەڭىنەن توقتالعان قالا باسشىسى مۇرات ايتەنوۆ قالامىزدى تازا ۇستاۋ – ستراتەگيالىق مىندەت ەكەنىن ايتتى. ءتارتىپ بولعان جەردە تازالىق بولاتىنىن ەسكەرتىپ، ءتارتىپتى ورنىقتىرۋدا جۇيەلى جۇمىستار اتقارۋدى تاپسىردى. تۇرعىن ءۇي قاتىناسىنداعى جاڭا فورماتتى حالىققا تۇسىندىرۋدە ءتيىمدى تۇستارىن ناقتى دەرەكتەرمەن ءتۇسىندىرۋدى جۇكتەدى.

شىمكەنت قالاسى اكىمدىگىنىڭ باسپا ءسوز قىزمەتى