الماتىدا جوعالعان اقنازار قاجىمۇراتتىڭ قايتىس بولعانى بەلگىلى بولدى. بۇل تۋرالى قالالىق پوليسيا دەپارتامەنتى حابارلادى.
بۇگىن الەۋمەتتىك جەلىدە اقنازاردىڭ تۋعان-تۋىستارى وعان ىزدەۋ سالدى. ول 3 قاراشادا ءىز-تۇزسىز جوعالىپ كەتكەنى حابارلاعان. سول كۇنى كەشكى ۋاقىتتا اجەسىمەن تەلەفون ارقىلى سويلەسىپ، كەيىن بايلانىسقا شىقپاعان.
الماتى قالالىق پوليسيا دەپارتامەنتى جاس جىگىتتىڭ دەنەسىن بوستاندىق اۋدانىنان تاپتى.
"دەنەسىندە زورلىق-زومبىلىق ىزدەرى جوق. قازىرگى كەزدە اقنازاردىڭ ولىمىنە سەبەپ بولعان جايتتار انىقتالىپ جاتىر. سوت-مەديسينالىق ساراپتاما تاعايىنداعان" دەلىنگەن حابارلامادا.
ايتا كەتەيىك، 2018 جىلى اقنازار قاجىمۇراتتىڭ ەسىمى الەمنىڭ جاس دارىندارى اراسىندا كەڭىنەن تانىلدى. الماتىداعى فيزيكا-ماتەماتيكا باعىتىنداعى نازاربايەۆ زياتكەرلىك مەكتەبىنىڭ تۇلەگى ACT جانە SAT Subject Tests حالىقارالىق ەمتيحاندارىنان سۇرىنبەي ءوتىپ، ەڭ جوعارى ۇپاي جينادى.
سونىڭ ارقاسىندا امەريكانىڭ كەز كەلگەن ۇزدىك جوعارى وقۋ ورنىن تاڭداۋعا مۇمكىندىك العان. ول گارۆارد ۋنيۆەرسيتەتىنىڭ گرانتىن الدى.
پىكىر قالدىرۋ