بۇگىن ماجىلىستە پالاتا ءتوراعاسى نۇرلان نىعماتۋلين پولشا رەسپۋبليكاسىنىڭ سەنات مارشالى  توماش گرودزكييمەن كەزدەسىپ، ەكى ەل اراسىنداعى ىنتىماقتاستىقتى دامىتۋدىڭ  وزەكتى ماسەلەلەرى بويىنشا پىكىر الماستى.

پالاتا سپيكەرى كەلەسى جىلى قازاقستان مەن پولشا اراسىنداعى ديپلوماتيالىق قاتىناستاردىڭ ورناعانىنا 30 جىل تولاتىنىن اتاپ ءوتىپ، وسى جىلدار ىشىندە ەلدەر اراسىندا سەنىمدى ساياسي ديالوگ ورناعانىن، ساۋدا-ەكونوميكالىق جانە مادەني-گۋمانيتارلىق ىقپالداستىقتىڭ بەلسەندى دامىعانىن جەتكىزدى.

كەزدەسۋ بارىسىندا ءماجىلىس ءتوراعاسى قازاقستاننىڭ تۇڭعىش پرەزيدەنتى نۇرسۇلتان ءابىش ۇلى نازاربايەۆتىڭ قازاقستان-پولشا ىنتىماقتاستىعىن نىعايتۋعا قوسقان ۇلەسى ەرەكشە ەكەنىن، وسى جولدا مەملەكەت باسشىسى قاسىم-جومارت توقايەۆتىڭ ەلدەر اراسىنداعى جان-جاقتى ارىپتەستىكتى دامىتۋعا زور ءمان بەرەتىنىن ايتتى.

نۇرلان ءنىعماتۋليننىڭ ايتۋىنشا، مارتەبەلى مەيماننىڭ ەلىمىزگە ساپارى پارلامەنتارالىق ديالوگتى ودان ءارى نىعايتۋعا جانە ەلدەرىمىز اراسىنداعى ەكىجاقتى ءوزارا ءىس-قيمىلدى كەڭەيتۋگە ەلەۋلى سەرپىن بەردى.

ءوز كەزەگىندە، توماش گرودزكيي  قازاقستانمەن ءوزارا ءىس-قيمىلدى دامىتۋ، حالىقتار اراسىنداعى قاتىناستار دوستىق پەن ءوزارا كومەك نەگىزىندە قۇرىلاتىنىن اتاپ ءوتىپ، قازاقستاندا ءتۇرلى ۇلت وكىلدەرىنىڭ دوستىق پەن كەلىسىمدە ءومىر ءسۇرىپ جاتقانىنا قىزىعۋشىلىق تانىتتى.

سونىمەن قاتار، تاراپتار پارلامەنتارالىق ديالوگتى ارتتىرۋعا ەرەكشە نازار اۋداردى.

وتىرىس بارىسىندا نۇرلان نىعماتۋلين مەملەكەت باسشىسىنىڭ باستاماسىمەن ەلىمىزدە جۇرگىزىلىپ جاتقان ساياسي جۇيەنى رەفورمالاۋ، ازاماتتىق قوعامدى دامىتۋ جونىندەگى جۇمىستارعا نازار اۋداردى. ءماجىلىس ءتوراعاسى سونداي-اق، قازاقستان پارلامەنتى ەلدى ساياسي جاڭعىرتۋ ءۇشىن قاجەتتى زاڭنامالىق بازانى قامتاماسىز ەتە وتىرىپ، بۇل پروسەسكە بەلسەندى تۇردە تارتىلعانىن اتاپ ءوتتى.

ءماجىلىس ءتوراعاسى پارلامەنتارالىق بايلانىستاردى نىعايتۋدىڭ ماڭىزدىلىعى تۋرالى ايتا كەلىپ، پولياك ارىپتەسىنە قازاقستاندىق جانە پولياك پارلامەنتشىلەرىنىڭ ىنتىماقتاستىق جونىندەگى توپتار، سونداي-اق زاڭنامالىق تاجىريبەمەن الماسۋ ءۇشىن ءتيىستى كوميتەتتەر دەڭگەيىندەگى ءوزارا بايلانىستى كۇشەيتۋدى ۇسىندى.

ءوز كەزەگىندە، سەنات مارشالى توماش گرودزكيي پولياك سەناتورلارىنىڭ قازاقستانمەن بارلىق سالادا ىنتىماقتاستىقتى دامىتۋعا قاجەتتى قولداۋ كورسەتۋگە دايىن ەكەندىگىن ايتتى.

كەزدەسۋ سوڭىندا ءماجىلىس ءتوراعاسى نۇرلان نىعماتۋلين پولياك ارىپتەستەرىن جانە پولشا حالقىن 11 قاراشا كۇنى اتاپ وتەتىن ۇلتتىق مەرەكە –پولشا تاۋەلسىزدىگى كۇنىمەن قۇتتىقتادى.

نۇرلان نىعماتۋلين مەن توماش گرودزكيي قازاقستاندىق جانە پولشالىق پارلامەنت وكىلدەرى اراسىنداعى ديالوگتى جانداندىرۋ ەكى ەل ءۇشىن دە ءتيىمدى بولاتىنىنا سەنىم ءبىلدىردى.

ءماجىلىستىڭ باسپا ءسوز قىزمەتى