مەن،  ءتىلى باسقا بولسا دا تىلەگى ءبىر، ءجۇزى باسقا بولسا دا جۇرەگى ءبىر، قازاقستاندىق كورەي وتباسىندا تاربەلەنىپ وسكەن قاراپايىم ازاماتپىن.

بۇگىندە شىمكەنت قالاسىنداعى №88 جوبب مەكتەپتە دەنە شىنىقتىرۋ ءپانىنىڭ ءمۇعالىمىمىن.

قالالىق كورەي ەتنومادەني بىرلەستىگى جانىنداعى جاستار قاناتىنىڭ مۇشەسىمىن.

شاردارادا تۋىلىپ، جەتىسايدا جەتىلدىم، شىمكەنتتە  شىڭدالدىم.

اۋىلدا وسكەننەن بولار، قازاق ءتىلىن جەتىك مەڭگەردىم، قازاقي تاربيە الدىم.

قازاق ءتىلىن بىلگەنىمنىڭ ارقاسىندا، قازاقتىڭ كوركەم ادەبيەتىنە، ونىڭ ىشىندە اباي اتامىزدىڭ شىعارمالارىنا دەگەن قىزىعۋشىلىعىم، مەنى ءبىر تالاي جەتىستىكتەرگە شىعاردى. ومىرىمە ءمان بەرىپ، قايتا قاراۋعا ىقپال ەتتى.  ماسەلەن، حاكىم اباي قۇناباي ۇلىنىڭ: «ءبىرىڭدى قازاق، ءبىرىڭ دوس، كورمەسەڭ ءىستىڭ ءبارى بوس»، دەگەن ءسوزى، ءبىر قاراعاندا جاتتاندى ءسوز تىركەسى رەتىندە كورىنەر. ءبىراق ونىڭ تۇبىنە ۇڭىلگەن ادام، ءبىراز دۇنيەنى اڭعارادى. قاي كەزدە دە وزەكتىلىگىن جويماعان حاكىم ابايدىڭ بۇل ءسوزى قازىرگى ءبىزدىڭ قوعامدى سيپاتتاپ تۇرعانداي اسەر قالدىرادى. ەلدەگى بارلىق ەتنوستار مەملەكەت قۇراۋشى قازاقتىڭ ماڭايىنا توپتاسىڭدار، بۇگىنىڭدى، بولاشاعىڭدى قازاقپەن بايلانىستىر دەپ وتىر.

ودان ءبولىنىپ كەتە المايسىڭ. سەبەبى سەنىڭ تۋعان جەرىڭ، كىندىك قانىڭ تامعان جەرىڭ – قازاقستان. سوندىقتان وسىندا تۇراتىن ءبارىڭ بىر-بىرىڭمەن دوس، باۋىر بولىپ، ءتاتۋ-تاتتى عۇمىر كەشىڭدەر. بىرلىك بولماي تىرلىكتەرىنىڭ ناتيجەلى بولمايدى، دەپ تۇرعانداي سەزىلەدى.

ءبىرقاتار بايقاۋلاردا باعىمدى سىنادىم. سىيلىق، ماراپات ءۇشىن ەمەس، اباي اتامىزعا دەگەن قۇرمەتىم، قىزىعۋشىلىعىم سوعان يتەرمەلەدى.  بىلتىر حاكىمنىڭ 175 جىلدىعىنا وراي ەتنوس جاستارى اراسىندا وتكەن رەسپۋبليكالىق بايقاۋدا باس جۇلدەگەر اتاندىم.

ءسوزدىڭ قىسقاسى، «ادامزاتتىڭ ءبارىن ءسۇي باۋىرىم دەپ...» دەگەن ءىلىمدى اباي اتامىزدان ۇيرەندىم. ءبىلىم الۋ، ىزدەنىس پەن ءتىل ءبىلۋدىڭ پايداسىن ۇعىندىم.

ايتايىن دەگەنىم، تىلگە، ەلگە قۇرمەت – شىنايى ىقىلاس پەن ىزگى نيەتتەن، اقەدىل پەيىلدەن تۋادى.

ءوزىم قازاقتىڭ جيەنى ءارى كۇيەۋ بالاسى رەتىندە «جىگىتتىڭ جاقسى بولۋى ناعاشىدان» دەگەن ءسوزدىڭ شىندىعىنا تالاي كوز جەتكىزدىم.

مەن كەزىندە قازاقستاندا كۇشتەپ قونىس اۋدارىلعان كورەيلەردىڭ 4ء-شى ۇرپاعىمىن. ءوز باسىم بولاشاعىمدى قازاقستانمەن بەكەم بايلانىستىرىپ، بەلىن بەكەم بۋعان جاس بۋىننىڭ وكىلىمىن. اكەم ايتپاقشى، وسىندا جاتقان اتا-بابامنىڭ سۇيەگىن تاستاپ ەشقايدا كەتپەيمىن. سەبەبى،  بار قازاققا ورتاق قازاق جەرى – مەنىڭ ەلىم، مەنىڭ جەرىم، مەنىڭ وتانىم!

 مەن تاۋەلسىزدىك قۇرداسىمىن! بيىل 30-عا تولامىن.

الدا مەجەلەگەن تالاي جوبا-جوسپارىمدى ىسكە اسىرىپ، ەلىمە پايدامدى تيگىزسەم دەگەن ويىم بار. اباي اتامىزدىڭ 37ء-شى قارا سوزىندە: «ءوزىڭ ءۇشىن ەڭبەك قىلساڭ، ءوزى ءۇشىن وتتاعان حايۋاننىڭ ءبىرى بولاسىڭ، ادامدىقتىڭ قارىزى ءۇشىن ەڭبەك قىلساڭ، اللانىڭ سۇيگەن ق ۇلىنىڭ ءبىرى بولاسىڭ»، دەيدى. سوندىقتان بارشا زامانداستارىمدى ەل يگىلىگى ءۇشىن ەڭبەك ەتۋگە، تاۋەلسىز قازاقستاننىڭ ابىرويىن اسقاقتاتۋ باعىتىندا جۇمىس ىستەۋگە شاقىرامىن! ول ءۇشىن بىزگە شىنايى نيەت، تىنىمسىز ەڭبەك جانە ۇزاعىراق ۋاقىت كەرەك.

ءار ادامدا ءبىر عانا وتان بولادى. مەنىڭ وتانىم – قازاقستان! مەن وسى جەردە، ءدال وسى التىن توپىراقتا تۋعانىما ماقتانامىن! ءوزىمدى باقىتتى سانايمىن!

بۇگىندە بارشامىز ەل ەرتەڭى ءۇشىن ءبىلىم الىپ، ەڭبەك ەتىپ جاتقان جايىمىز بار. تاۋەلسىزدىك تۋىن قولدا بەرىك تە بەكەم ۇستاۋ قازاقستاندى ءوز وتانىم دەپ سانايتىن ءاربىر قازاقستاندىقتىڭ ەڭ باستى بورىشى، ەڭ بيىك مۇراتى. ەلىمىزدىڭ ەڭسەلى كوك تۋى كوك اسپاندا جەلبىرەي بەرسىن! ەلىمىزدىڭ مەرەي تويى قۇتتى بولسىن!

پاك تەمۋر اندرەيەۆيچ،

شىمكەنت قالالىق كورەي ەتنومادەني بىرلەستىگى جانىنداعى جاستار قاناتىنىڭ مۇشەسى