تارازدا اۆتوبۋس جۇرگىزۋشىسى 58 جاستاعى ايەلدى قاعىپ كەتتى. بۇل تۋرالى جامبىل وبلىسى پوليسيا دەپارتامەنتىنىڭ باسپا ءسوز قىزمەتى حابارلادى.
وبلىستىق پوليسيا دەپارتامەنتىنىڭ مالىمەتىنشە، وقىس وقيعا بۇگىن تاڭعى ساعات 08:50-دە بولعان.
22 جاستاعى قوعامدىق كولىك جۇرگىزۋشىسى قالاداعى جامبىل مەن تولە بي كوشەلەرىنىڭ قيىلىسىندا جاياۋ جۇرگىنشىلەر جولىنان ءوتىپ بارا جاتقان 58 جاستاعى ايەلدى قاققان. سالدارىنان تۇرعىن وقيعا ورنىندا كوز جۇمعان.
"بۇل فاكت بويىنشا قىلمىستىق كودەكستىڭ 345-بابى 3-بولىگى (كولiك قۇرالدارىن پايدالانۋ قاعيدالارىن بۇزۋ، ابايسىزدا ادام ولىمىنە اكەپ سوققان ىس-ارەكەت) بويىنشا سوتقا دەيىنگى تەرگەۋ باستالدى. سوت-مەديسينالىق ساراپتاماسى تاعايىندالدى"، دەپ جازىلعان حابارلامادا.
پوليسيا دەپارتامەنتى باسقا اقپارات تەرگەۋ مۇددەسىندە سايكەس جاريا ەتىلمەيتىنىن حابارلادى.
پىكىر قالدىرۋ