"ارسەلورميتتال تەمىرتاۋعا" قاراستى اباي شاحتاسىنداعى مەتان گازى اتىلعاننان كەيىن جانساقتاۋ بولىمىنە تۇسكەن ەكى كەنشىنىڭ بەتى بەرى قارادى. ءبىر اجالدان امان قالعان ولار جارىلىستىڭ قالاي بولعانىن ايتىپ بەردى.

جارىلىس بولعان ساتتە جەر استىندا 8 كەنشى جۇمىس ىستەپ جاتقان.

– ءارقايسىمىز ءوز جۇمىسىمىزدى ىستەپ جاتقانبىز. تارس ەتە قالدى، سوسىن ءتۇتىن باسىپ كەتتى، ءبىتتى. شامدار ءسوندى، گازدىڭ ءيىسى جوق. ارعى جاعىن بىلمەيمىن، – دەدى كەنشى جەڭىس مارالبايەۆ.

ەلايدىن زەينالوۆ پەن جەڭىس مارالبايەۆتىڭ جانساقتاۋ بولىمىنەن شىققانىنا ەكىنشى كۇن. ەسىن جيىپ العان سوڭ، التى ارىپتەسىنەن ايىرىلعاندارىن ەستىگەندە قاتتى قايعىرعان. ال وزدەرى ءبىر اجالدان امان قالعان. ءقازىر ەم-دوم الىپ جاتقان كەنشىلەر جۇمىسقا جارامدىلىعى جونىندە مەديسينالىق كوميسسيادان وتەدى. جارامدى دەپ تانىلساق، تىرشىلىك قامىمەن شاحتاعا قايتا تۇسۋدەن وزگە امال جوق دەيدى.

ەسكە سالايىق، 7 قاراشا كۇنى تاڭعى ساعات 08:30 دا اباي شاحتاسىندا جارىلىس سالدارىنان 6 ادام قازا بولىپ، 2 ادام جاراقات العان.

توتەنشە جاعدايلار ءمينيسترى يۋريي يلين قايتىس بولعانداردىڭ وتباسىنا 10 جىلدىق جالاقى ەسەبىندە اقشالاي كومەك بەرىلەتىنىن ءمالىم ەتتى. وقىس وقيعا بويىنشا قىلمىستىق ءىس قوزعالعان.