الماتىدا ەل تاۋەلسىزدىگىنىڭ 30 جىلدىق مەرەيتويىنا وراي العاش رەت وزگە ۇلتتان شىققان يمامدار اراسىندا «ءتىل – دوستىق كوپىرى» اتتى ينتەللەكتۋالدى ءبىلىم سايىسى ءوتتى.

جەتىسۋ اۋدانىنا قاراستى «اباي قۇنانباي ۇلى» مەشىتىندە وتكەن سايىستى قمدب الماتى وكىلدىگى ۇيىمداستىرسا، ماقساتى – وزگە ۇلت وكىلدەرىنەن بولعان ءدىن قىزمەتكەرلەرى اراسىندا قازاق ءتىلىنىڭ مارتەبەسىن كوتەرۋ، ءتىل تازالىعى مەن ءسوز ونەرىن ناسيحاتتاۋ.

تارتىستى وتكەن سايىستا جازۋشى، كينودراماتۋرگ سماعۇل ەلۋباي، قمدب ءتوراعاسىنىڭ ورىنباسارى، نايب ءمۇفتي كەنجەالى مىرزابايەۆ، فيلولوگيا عىلىمدارىنىڭ كانديداتى، قمدب عۇلامالار كەڭەسىنىڭ مۇشەسى تورەالى قىدىر، PhD دوكتور تيمۋر اكىمحان ۇلى جانە الماتى قالاسىنىڭ باس يمامى تولەبي وسپان قازىلىق ەتتى.

سايىسقا الماتى قالاسىنداعى مەشىتتەردە قىزمەت ەتەتىن وزبەك، شەشەن، تاجىك، ۇيعىر، دۇنگەن ۇلتىنان شىققان 21 يمام قاتىستى. س.ەلۋبايدىڭ «اق بوز ءۇي» كىتابىنىڭ مازمۇنىن ايتىپ بەرۋ، 7 تاقىرىپتا ماقال-ماتەلدەردى جاتقا ايتۋ جانە ساۋاتتىلىق سايىسى (قازاق تىلىندە ديكتانت) كەزەڭدەرى بويىنشا وتكەن سايىستا توپ جارعان ءدىن قىزمەتكەرلەرى قارجىلاي جۇلدەلەرمەن ماراپاتتالدى.

«سىزدەر، ەلدى بىرلىككە باستاپ جۇرگەن ازاماتسىزدار. جاستار سىزدەرگە قاراپ بوي تۇزەيدى. قازاق ءتىلىن دامىتۋ ماقساتىندا ءوتىپ جاتقان سايىس – مەملەكەتتىك تىلگە كورسەتىلگەن قۇرمەت. الماتى قالاسىنىڭ باس يمامى ۇيىتقى بولعان بۇل شارانىڭ ماڭىزى زور دەپ سانايمىن» دەدى جازۋشى س.ەلۋباي. سونىمەن قاتار قالامگەر ءوزىنىڭ تۋىندىسىن يمامداردىڭ وقىپ، وسى رومان بويىنشا سايىسقا ءتۇسىپ جاتقاندىعىنا ريزاشىلىعىن ءبىلدىردى.

«باس ءمۇفتي ناۋرىزباي قاجى تاعان ۇلىنىڭ باستاماسىمەن جۇزەگە اسىرىلىپ كەلە جاتقان 7 باعىتتىڭ ءبىرى – ءدىن مەن ءداستۇر. يمامدار اراسىنداعى بۇل سايىس قازاق ءتىلىنىڭ مارتەبەسىن جانە ءدىن مەن ءداستۇر ساباقتاستىعىن دارىپتەۋگە باعىتتالعان. بارشا يمامدارىمىزعا اللا جار بولعاي» دەدى نايب ءمۇفتي كەنجەالى قوڭىراتباي ۇلى.

تىلدىك ءبىلىم دەڭگەيى مەن ءسوز ونەرىندە ەرەكشە كوزگە تۇسكەن ناۋرىزباي اۋدانىنا قاراستى «نۇر» مەشىتىنىڭ ۇستازى مۇحاممەدامين قاري باسييەۆ باس جۇلدەنى قانجىعاسىنا بايلاپ، ۇمرا قاجىلىعىنا جولداما الدى.

I ورىندى يەلەنگەن الاتاۋ اۋدانىنداعى «نۇر» مەشىتىنىڭ نايب يمامى ابدراحمان سۇلتانوۆ 100 000 تەڭگە قارجىلاي سىياقىنى جەڭىپ السا، II ورىن مەدەۋ اۋدانىنداعى «فاتيما» مەشىتىنىڭ ازانشىسى مۇحاممەدجان راسۋلمەتوۆكە بۇيىرىپ، 70 000 تەڭگەنى قانجىعاسىنا بايلادى. ال III ورىنعا تابان تىرەگەن الاتاۋ اۋدانىنا قاراستى «نۇر» مەشىتىنىڭ نايب يمامى باحرام اسانوۆقا 50 000 تەڭگە بەرىلسە، سايىستا بەلسەندىلىك تانىتقان وزگە 5 يمامعا 10 000 تەڭگەدەن ىنتالاندىرۋ سىيلىعى تابىستالدى. ودان بولەك سايىسقا قاتىسۋشى بارلىق يمامعا قارجىلاي سىياقى ۇلەستىرىلدى.

العاش رەت وتكىزىلگەن سايىس جونىندە الماتى قالاسىنىڭ باس يمامى تولەبي وسپان: «سايىستى وتكىزۋدەگى باستى ماقسات – قازاق ءتىلى مەن ءسالت-داستۇردى دارىپتەۋ. سونىمەن قاتار وزگە ۇلت وكىلدەرىنەن بولعان يمامدارىمىزدىڭ قازاق تىلىندە ەركىن سويلەپ، جاماعاتپەن جاقىن ارالاسۋ دەڭگەيىن كوتەرۋ جانە قازاق ءتىلىنىڭ قولدانىس اياسىن كەڭەيتۋ. بۇل شارا ءوز جالعاسىن تابادى دەگەن سەنىمدەمىز» دەپ اتاپ ءوتتى.

ءبىلىم سايىس الماتى ورتالىق مەشىتىنىڭ YouTube ارناسىنان تىكەلەي ەفيردە كورسەتىلدى. سايىس قاتىسۋشىلارى الداعى ۋاقىتتا دا وسىنداي يگى باستاما ارقىلى دىنگە قىزمەت، ۇلتقا، قازاق تىلىنە قۇرمەتتى كۇشەيتەتىن جوبا جالعاسىن تاپسا ەكەن دەگەن تىلەكپەن تارقاستى.