18 قاراشا، ساعات 11:00-دە نۇر-سۇلتان قالاسىنداعى “ديپلومات” قوناق ءۇيىنىڭ “بايتەرەك” ءماجىلىس زالىندا (قونايەۆ كوشەسى، 29/1) قازاق شارۋالارىنىڭ ءى قۇرىلتايى وتەدى.

اۋىلشارۋاشىلىق سالاسىنداعى كوپ ماسەلە كۇردەلەنىپ بارا جاتقانى جاسىرىن ەمەس. ماڭعىستاۋ، اتىراۋ، قىزىلوردا، جالپى قازاقستاننىڭ ءبىراز بولىگىندەگى قۋاڭشىلىق، جۇت جاعدايى تىپتەن اسقىنىپ كەتىپ، ەلدى الاڭداتىپ وتىرعانى دا بەلگىلى.

«قۇرىلتايدىڭ ماقساتى – شارۋا مەن بيلىك اراسىنداعى بايلانىستى جانداندىرۋ. ەكى جاقتى مامىلەگە كەلۋ. باسقا ساياساتتا ءىسىمىز جوق!»، – دەپ اۋىلشارۋاشىلىق ەكسپەرتى الماسبەك سادىربايەۆ ءوز پاراقشاسىندا جازدى. سونداي-اق قۇرىلتاي اياسىندا تومەندەگى تاقىرىپتاردى تالدايمىز، شەشىم ىزدەيمىز دەپ اتاپ ءوتتى:

1. ماڭعىستاۋداعى جۇت. ونىڭ سالدارىمەن كۇرەسۋ؛
2. تۇركىستان، جامبىل وبلىستارىنداعى سۋبسيديا داۋى؛
3. استىق وڭدەۋ ماسەلەلەرى جانە جەمنىڭ باعاسىنا اسەرى؛
4. مايلى داقىلداردى وڭدەۋ ماسەلەلەرى؛
5.ءجۇن وڭدەۋ ماسەلەسى؛
6. اۋىلشارۋاشىلىق سالاسىن سۋبسيديالاۋداعى جەمقورلىققا قارسى ءىس-قيمىل ارەكەتتەرى؛
7. قازاقستانداعى جىلقى شارۋاشىلىعىن دامىتۋ؛
8. نەسيەلەر پرولونگاسياسى مەحانيزمىندەگى شالالىقتار؛
9. اۋىلشارۋاشىلىعىن قارجىلاندىرۋ جانە نەسيە پرولونگاسياسى ماسەلەسى؛

بۇل تاۋەلسىزدىك العالى بەرى ۇلكەن كولەمدە وتەيىن دەپ وتىرعان I قۇرىلتاي. پرەزيدەنت اكىمشىلىگىنەن باستاپ، مينيسترلەرگە، پارتيا باسشىلارىنا، تانىمال قوعام وكىلدەرىنە، زيالى قاۋىمعا، جۋرناليستەر مەن بلوگەرلەرگە، ەكولوگتارعا دەيىن شاقىرتۋ جىبەرىلەتىنىن جانە قاتىسامىن، كەلىپ كورەمىن، سويلەيمىن دەگەن ازاماتتارعا شەكتەۋ قويىلمايتىنىن دا تىلگە تيەك ەتكەن.

ەلەنورا ءامىر