ءماجىلىس ءتوراعاسى نۇرلان نىعماتۋلين ەۋروپا كەڭەسىنىڭ پارلامەنتتىك اسسامبلەياسىنىڭ  ءتوراعاسى ريك دەمسپەن كەزدەستى.

ءىس-شارا بارىسىندا نۇرلان نىعماتۋلين بيىلعى جىل ەلىمىز ءۇشىن ايتۋلى وقيعا قازاقستان تاۋەلسىزدىگىنىڭ 30 جىلدىعى ەكەنىن اتاپ ءوتىپ، مەملەكەت باسشىسى قاسىم-جومارت توقايەۆتىڭ باستاماسىمەن ەلىمىزدە ءوتىپ جاتقان ساياسي جۇيەنى رەفورمالاۋ، ەكونوميكانى جاڭعىرتۋ، ازاماتتىق قوعامدى دامىتۋ ۇدەرىستەرىنە ەرەكشە نازار اۋداردى.

ءماجىلىس ءتوراعاسى مارتەبەلى مەيرامعا سايلاۋ پروسەسىن دەموكراتيالاندىرۋ جانە سايلاۋ زاڭناماسىن جەتىلدىرۋ، ايەلدەردىڭ قۇقىقتارى مەن مۇمكىندىكتەرىن كەڭەيتۋ، پارلامەنتتىك وپپوزيسيا ينستيتۋتىن زاڭنامالىق دەڭگەيدە بەكىتۋ ماقساتىنداعى كەشەندى رەفورمالاردى اتاپ ءوتتى.

ءوز كەزەگىندە، ريك دەمس قازاقستاننىڭ پارلامەنتتە ايەلدەردىڭ وكىلدىك ەتۋ جونىندەگى كۇش-جىگەرىن جوعارى باعالايتىنىن ايتتى.

ودان ءارى تاراپتار قازاقستان مەن ەۋروپا كەڭەسىنىڭ ىنتىماقتاستىعىن دامىتۋدى قولداي وتىرىپ، ءوزارا ءىس-قيمىل باعىتتارىن، ونىڭ ىشىندە قازاقستاننىڭ ءبىرقاتار ەۋروپالىق كونۆەنسيالارعا قوسىلۋ، سونداي-اق ەكولوگيا جانە كليمات ماسەلەلەرى بويىنشا ىنتىماقتاستىق ماسەلەلەرىن تالقىلادى.

نۇرلان نىعماتۋلين ومبۋدسمەن ينستيتۋتىن دامىتۋ ارقىلى ادام جانە ازاماتتىڭ قۇقىقتارى مەن بوستاندىقتارىن قورعاۋ سالاسىنداعى زاڭنامانى جەتىلدىرۋ، سىبايلاس جەمقورلىققا قارسى ءىس-قيمىل، بالا قۇقىقتارىن قورعاۋ، ەرىكتىلەر قىزمەتى جانە ت. ب. سالالارداعى قازىرگى ۋاقىتتا پارلامەنتتە جالعاسىپ جاتقان جۇمىستار تۋرالى ايتتى.

ءماجىلىستىڭ باسپا ءسوز قىزمەتى