بەلگىلى جۋرناليست قاسىم امانجول پرەزيدەنت قاسىم-جومارت توقايەۆ بيلىككە ءتۇرلى مانيپۋلياسيامەن كەلگەن دەگەن پىكىردە. بۇل تۋرالى ول  «Qasqa Jol» يۋتۋب كانالىنا بەرگەن سۇحباتىندا ايتتى.

– مەن ول ادامدى (ق.توقايەۆ - رەد.) پرەزيدەنتتىك ورىنعا ءتۇرلى مانيپۋلياسيالارمەن كەلگەن ادام دەپ ەسەپتەيمىن. سەبەبى ول ادامدى نازاربايەۆتىڭ ءوزى ورنىنا مۇراگەر رەتىندە تاستاپ كەتۋى دە، 1،5 ايدان كەيىن  ىلە-شالا وتكەن سايلاۋ دا، مۇنىڭ ءبارى كوپتەگەن زاڭبۇزۋشىلىقتارمەن بولدى. سول سەبەپتەن ونىڭ زاڭدىق كۇشى مەن ءۇشىن جوق. ءبىراق ول فاكت بويىنشا پرەزيدەنت. ەندى باسقا ەلدىڭ پرەزيدەنتتەرى مويىندادى. پرەزيدەنتتىك ورىندا وتىر، پرەزيدەنتتىك شەشىمدەر قابىلداپ جاتىر.

سوندىقتان ونى پرەزيدەنت دەيسىڭ. مەن ءوزىم جەكە قازاقستان ازاماتى رەتىندە،  وسىنداي ۇلكەن مانيپۋلاسيالاردان كەيىن بيلىككە كەلگەندىكتەن ونى "پرەزيدەنت" دەپ ەسەپتەمەيمىن.

قوعامدا وسى قازىرگى بيلىكتىڭ 30 جىل بويى جۇرگىزىپ كەلگەن ساياساتىنا ۇلكەن كۇمانمەن قارايتىن، ابدەن ءبىر عانا ادام مەن ءبىر اۋلەتتىڭ بيلەپ  وتىرعانىن مويىنداعىسى كەلمەيتىن ار-ۇياتى بار ازاماتشىل قوعام مەن ازاماتتار بار ەكەنىنە سەنەمىن. ونداي ازاماتتار كوپ دەپ ويلايمىن، – دەدى قاسىم امانجول.