بۇگىن شىمكەنت قالاسىنىڭ مەملەكەتتىك مۇراعاتى عيماراتىندا «شىمكەنت قالاسىنىڭ قۇرمەتتى ازاماتتارى» جيناعىنىڭ تانىستىرىلىمى ءوتتى. تۇساۋكەسەر راسىمىنە قالا اكىمىنىڭ ءبىرىنشى ورىنباسارى شىڭعىس مۇقان، قالانىڭ قۇرمەتتى ازاماتتارى، زيالى قاۋىم وكىلدەرى مەن جاستار قاتىستى.

ەل تاۋەلسىزدىگىنىڭ 30 جىلدىعىنا وراي توپتاستىرىلعان جيناقتىڭ تۇساۋىن كەسكەن شىڭعىس مۇقان جارىققا شىققان تۋىندىنىڭ ماقساتىنا توقتالدى.

«بيىل مەملەكەتتىك تاۋەلسىزدىگىمىزگە 30 جىل. بۇل مەرەيلى بەلەس وتكەنىمىزدى سارالاپ، بولاشاعىمىزدىڭ باعدارىن بەلگىلەيتىن كەزەڭ. قالامىزدىڭ بۇگىنگى دارەجەگە جەتۋىنە تالاي بۋىننىڭ ەڭبەگى ءسىڭدى. قالانىڭ قالىپتاسۋىندا جارقىن ءىز قالدىرعان كوپتەگەن قايراتكەرلەردىڭ ەسىمدەرى تاريحىمىزدا اتالماي ۇمىت قالدى. بۇل باعىتتا قالا تاريحىن، ونىڭ ومىرىندە ەسىمى بەلگىلى بولعان تۇلعالار تاعىلىمىن جيناقتاۋ ماقساتىندا قالا اكىمىنىڭ تاپسىرماسىمەن «شىمكەنت ەنسيكلوپەدياسى» جارىق كورەتىن بولادى. وسى جوبانىڭ باستاماسى رەتىندە بۇگىن «شىمكەنت قالاسىنىڭ قۇرمەتتى ازاماتتارى» جيناعىن شىعارىپ وتىرمىز. بۇل كىتاپ – جاس ۇرپاققا، كوپشىلىك قاۋىمعا دارىندى شىمكەنتتىكتەر تۋرالى كەڭىنەن ماعلۇمات بەرىپ، قالا تۇرعىندارىنىڭ ينتەللەكتۋالدىق الەۋەتىن ارتتىرادى دەگەن ويدامىن»،-دەدى قالا باسشىسىنىڭ ءبىرىنشى ورىنباسارى.

جيناقتا 1967 جىلدان 2021 جىلدار ارالىعىنداعى كەزەڭدە شىمكەنتتىڭ وركەندەۋىنە ەرەكشە ۇلەس قوسقان 145 ءتۇرلى سالا قايراتكەرلەرىنىڭ ءومىر دەرەگى، سىڭىرگەن ەڭبەكتەرى تىزبەكتەلگەن. كىتاپقا ەنگەن تۇلعالاردىڭ ەسىمدەرى قالا نەمەسە وڭتۇستىك وڭىرىنە عانا ەمەس، بۇكىل رەسپۋبليكامىزعا، حالىقارالىق دارەجەدە تانىلعان. ولاردىڭ قاتارىندا بەلگىلى كومپوزيتور ءشامشى قالداياقوۆتىڭ، مەملەكەت قايراتكەرى اسانباي اسقاروۆتىڭ، قوعام قايراتكەرى ءادىل ساسبۇقايەۆتىڭ، اتاقتى باپكەر مىرزاعالي ايتجانوۆتىڭ، تاعى باسقا ەلگە بەلگىلى ازاماتتاردىڭ ەسىمدەرى بار.

ءىس- شارا بارىسىندا شىمكەنت قالاسىنىڭ قۇرمەتتى ازاماتتارى ەركىن ساتقانبايەۆ، مىرزاعالي ايتجانوۆ ءسوز سويلەسە، شىمكەنت قالاسىنىڭ قۇرمەتتى ازاماتى، حالىق اقىنى مۇحتار شاحانوۆ پەن امالبەك تشانوۆتىڭ بەينەجولداۋى كورسەتىلدى.

جيناقتىڭ باسپادان شىققان العاشقى 1 مىڭ داناسى قالا كىتاپحانالارى مەن وقۋ ورىندارىنا تاراتىلماق.