ءماجىلىس دەپۋتاتى بەرىك ءابدىعالي ۇلى "قازاق ءتىلى" قوعامىنىڭ پرەزيدەنتى بولىپ سايلاندى. بۇل تۋرالى ءماجىلىس دەپۋتاتى ايدوس سارىم facebook پاراقشاسىندا حابارلادى.

"قازاق ءتىلى" قوعامى – قازاق ءتىلىن، مادەنيەتىن، ادەبيەتىن، تاريحىن وقىپ-ۇيرەنۋگە، ادەت-عۇرپىن، تۇرمىس-سالتىن ساقتاپ، ونى ودان ءارى دامىتۋعا ىقىلاستى قازاق جانە باسقا ۇلت وكىلدەرىنىڭ باسىن بىرىكتىرەتىن ەرىكتى ۇيىم.

ۇيىم 1989 جىلى الماتى قالاسىندا وتكەن 1-قۇرىلتايدا قۇرىلعان. وندا "قازاق ءتىلى" قوعامىنىڭ جارعىسى مەن باعدارلاماسى قابىلدانىپ، مىندەتتەرى ايقىندالدى.

قوعامدىق ۇيىم جۇمىسىن ق ر كونستيتۋسياسى، ءتىل تۋرالى زاڭى، ءوزىنىڭ جارعىسى جانە حالىقارالىق قۇقىقتىق، ادامگەرشىلىك نورمالار نەگىزىندە جۇرگىزەدى.

قوعامنىڭ ماقساتى – قازاق ءتىلىنىڭ رەسپۋبليكادا جانە ودان تىس جەرلەردە كەڭىنەن قولدانىلۋىنا بايلانىستى مەملەكەتتىك، قوعامدىق ءار ءتۇرلى ۇيىمدار مەن ۇلتتىق مادەني ورتالىقتارعا، جەكە ازاماتتارعا كومەك كورسەتۋ.

ۇيىمدى بۇعان دەيىن ۇزاق جىلدار اكادەميك ءومىرزاق ايتپايەۆ باسقارعان. عالىم 2020 جىلى ومىردەن وتكەننەن كەيىن ۋاقىتشا ءتوراعالىق بەلگىلى فيلولوگ ەردەن قاجىبەككە وتكەن.