ورتالىق كوممۋنيكاسيالار قىزمەتىندە اقتوبە وبلىسىنىڭ 2021 جىلدىڭ توعىز ايى ىشىندەگى الەۋمەتتىك-ەكونوميكالىق دامۋىنىڭ قورىتىندىسى مەن الداعى كەزەڭگە جوسپارى جايىندا باسپا ءسوز ءماسليحاتى ءوتتى.
وبلىس اكىمى وڭداسىن ورازالين پرەزيدەنتتىڭ حالىقتىڭ ءال-اۋقاتىن جاقسارتىپ، ەكونوميكالىق ءوسىمدى قامتاماسىز ەتۋ بويىنشا تاپسىرماسىنىڭ جۇزەگە اسىرىلۋى تۋرالى باياندادى.

«ەلىمىزدىڭ ءوز الدىنا دەربەس مەملەكەت قۇرعانىنا مىنەكي 30 جىل بولدى. بۇگىنگى كۇنى اقتوبە وبلىسىندا 927 مىڭ تۇرعىن بار. ال 1991 جىلى 740 مىڭ بولعان. سايكەسىنشە، اقتوبە قالاسىنىڭ تۇرعىندارىنىڭ سانى شامامەن ەكى ەسە ءوسىپ، بۇگىنگى كۇنگە 551 مىڭدى  قۇرايدى. وڭىرلىك الەۋمەتتىك-ەكونوميكالىق جاعدايدىڭ جاقسارعانىن وسى ساندار ارقىلى دا بىلۋگە بولادى. ويتكەنى ادام بالاسىنىڭ تابيعاتىنا ءتان نارسە، قاي جەردە  ءومىر ءسۇرۋ ىڭعايلى، سول جەرگە كوبىرەك شوعىرلانادى. ءبىز ءوڭىردىڭ سەرپىندى دامۋىنا جانە حالىقتىڭ ءومىر ءسۇرۋ ساپاسىن ارتتىرۋعا باعىتتالعان پرەزيدەنت ساياساتىن ىسكە اسىرۋدى جالعاستىرۋدامىز»،- دەپ اتاپ ءوتتى وڭداسىن ورازالين.
ونىڭ سوزىنشە، جىل باسىنان بەرى نەگىزگى الەۋمەتتىك-ەكونوميكالىق كورسەتكىشتەر بويىنشا وڭ ديناميكا بايقالادى. ماسەلەن، ونەركاسىپ ءوندىرىسىنىڭ كولەمى وتكەن جىلدىڭ سايكەس كەزەڭىمەن سالىستىرعاندا 4،8%-عا ۇلعايدى. ونىڭ ىشىندە وڭدەۋ ونەركاسىبىندە 11،2% ءوسىم تىركەلدى. نەگىزگى كاپيتالعا سالىنعان ينۆەستيسيالاردىڭ ءوسۋ قارقىنى - 130،5%-دى، قۇرىلىس – 103،4%-دى، تۇرعىن ءۇيدى پايدالانۋعا بەرۋ - 112%-دى، ساۋدا - 104،1%-دى قۇرادى.
«بيىلعى جىلعى قۇرعاقشىلىقتىڭ سەبەبىنەن ءداندى جانە مايلى داقىلداردىڭ ونىمدىلىگى تومەن بولدى. بۇل رەتتە، وسىمدىك شارۋاشىلىعىنىڭ ءونىمى 83،7%–عا ازايدى، سونىڭ سالدارىنان اۋىل شارۋاشىلىعى ءونىمىنىڭ كولەمى 95،1%–عا تومەندەدى. دەگەنمەن، جىل قورىتىندىسى بويىنشا مال شارۋاشىلىعى ەسەبىنەن اۋىل شارۋاشىلىعى كورسەتكىشىن وڭ ديناميكاعا شىعارۋدى جوسپارلاپ وتىرمىز. اعىمداعى جىلى اۋىل شارۋاشىلىعى تاۋارىن وندىرۋشىلەردى مەملەكەتتىك قولداۋ ماقساتىندا رەسپۋبليكالىق جانە جەرگىلىكتى بيۋدجەتتەن شامامەن 26،7 ملرد.تەڭگە سۋبسيديا ءبولىندى. ونىڭ ىشىندە، قوماقتى قاراجات، ياعني  6،7 ملرد. تەڭگە جەم-شوپ ساتىپ الۋعا ءبولىندى. ءبىزدىڭ وبلىس – بيىل اۋىل شارۋاشىلىعىنا وسىنداي اۋقىمدى قولداۋ كورسەتىپ وتىرعان جالعىز ءوڭىر»،- دەدى و.ورازالين.
جىل باسىنان بەرى 624 مىڭ م2 تۇرعىن ءۇي پايدالانۋعا بەرىلدى، جىل سوڭىنا دەيىن 1 ملن.-نان استام م2 پايدالانۋعا بەرۋ جوسپارلانىپ وتىر. وسى جىلدىڭ قورىتىندىسى بويىنشا ءوڭىر حالقىنىڭ 97،3%-ى ورتالىقتاندىرىلعان سۋمەن، 93% -ى گازبەن قامتىلادى.
"314 شاقىرىم جول جوندەلدى، جالپى، جىلدىڭ قورىتىندىسى بويىنشا 450 شاقىرىمنان استام جولدى جوندەۋ جوسپاردا بار، بۇل جەرگىلىكتى ماڭىزى بار جولداردىڭ جاقسى جانە قاناعاتتانارلىق جاعدايداعى ۇلەسىن 66%-عا دەيىن ارتتىرۋعا مۇمكىندىك بەرەدى»، دەدى سپيكەر.
وبلىس اكىمى وڭىردەگى سانيتارلىق-ەپيدەميولوگيالىق جاعدايعا توقتالدى. قازىرگى تاڭدا اقتوبە وبلىسى جاسىل ايماقتا.                     
و.ورازالين: «ارينە، كوروناۆيرۋستىق ىندەتكە قارسى كۇرەستىڭ نەگىزگى قۇرالى ۆاكسيناسيا بولىپ تابىلادى. 4 قاراشاداعى جاعداي بويىنشا وبلىستا ءبىرىنشى كومپونەنتپەن 339 مىڭ ادام، ەكىنشى كومپونەنتپەن 310،2 مىڭ ادام ەگىلدى»،- دەپ جەتكىزدى.

اقتوبە وبلىسى اكىمىنىڭ باسپا ءسوز قىزمەتى