ەڭبەكشىقازاق اۋداندىق اكىمدىگىنىڭ مالىمەتىنە سۇيەنسەك، عيماراتتىڭ جالپى الاڭى 325 شارشى مەتر. جەرگىلىكتى تۇرعىن، جومارت جۇرەك كاسىپكەر چيكايەۆ تاۆابير پوشتانىڭ ەسكى عيماراتىنىڭ ورنىنا اۋىلداستارىنىڭ يگىلىگىنە بەرۋ ءۇشىن جەكە قاراجاتىنا جاڭا نىسان تۇرعىزدى. سونىمەن بىرگە ول عيمارات ىشىندە قاجەتتى جيھاز بەن ينتەرەرلەر ساتىپ اپەردى. ال امبۋلاتوريانى مەديسينالىق قۇرال-جابدىقتارمەن اۋداندىق كوپ سالالى اۋرۋحانا قامتاماسىز ەتپەك.  

نىساننىڭ اشىلۋ سالتاناتىنا قاتىسقان ەڭبەكشىقازاق اۋدانىنىڭ اكىمى الىبەك جاقانبايەۆ بيزنەستىڭ الەۋمەتتىك جاۋاپكەرشىلىگى مەن ءوڭىر دامۋىنداعى مەسەناتتار قولداۋىنىڭ ماڭىزى تۋرالى اتاپ ءوتتى.

- «رۋحاني جاڭعىرۋ» باعدارلاماسىندا ەلباسى «پاتريوتيزم كىندىك قانىڭ تامعان جەرىڭە، وسكەن اۋىلىڭا، قالاڭ مەن وڭىرىڭە، ياعني تۋعان جەرىڭە دەگەن سۇيىسپەنشىلىكتەن باستالادى» دەگەن بولاتىن. بۇگىنگى شارا وسىنداي ەلجاندىلىقتىڭ، تۋعان جەرگە دەگەن جاناشىرلىقتىڭ كوپكە ۇلگى بولعان ءداستۇرلى جالعاسى دەپ بىلەمىز. ءبارىڭىزدى كەلە جاتقان مەرەكەلەرىڭىزبەن جانە جاڭا نىساننىڭ اشىلۋىمەن قۇتتىقتايمىن، - دەگەن ءا.جاقانبايەۆ مەسەناتقا ريزاشىلىعىن ءبىلدىردى.  

سالتاناتتى شارادا عيماراتتىڭ لەنتاسى قيىلىپ، نىسان كوكتوبە اۋىلدىق وكرۋگى تۇرعىندارىنىڭ يگىلىگىنە بەرىلدى.

جالپى الماتى وبلىسىندا تۇڭعىش پرەزيدەنت كۇنىنە وراي ءوڭىردىڭ ءار تۇكپىرىندە كوپتەگەن الەۋمەتتىك ماڭىزدى نىساندار اشۋ بەلگىلەنگەن. سولاردىڭ قاتارىندا سەرۆيستىك اكىمدىك، اۋىلدىق مادەنيەت ءۇيى، ونەر مەكتەبى، جەكەمەنشىك بالاباقشا، جاڭا سكۆەر جانە باسقالارى بار.