10 قاراشا كۇنى «اقتوبە وبلىسىنىڭ اۋىل شارۋاشىلىعى سالاسىن دامىتۋدىڭ جاڭا مۇمكىندىكتەرى» اتتى سەمينار ءوتتى. ونىڭ جۇمىسىنا وبلىس اكىمى وڭداسىن ورازالين، وبلىس اكىمىنىڭ ورىنباسارى جاقسىعالي يمانقۇلوۆ، اۋىل شارۋاشىلىعى باسقارماسىنىڭ باسشىسى ەسپاعانبەتوۆ، ۆەتەرەناريا باسقارماسىنىڭ باسشىسى قۇسايىن سارسەمباي، ق ر اشم اگروونەركاسىپ كەشەنىندەگى مەملەكەتتىك ينسپەكسيا كوميتەتىنىڭ وبلىستىق اۋماقتىق ينسپەكسياسىنىڭ باسشىسى داستان ساعىروۆ، «قازاقستان فەرمەرلەر قاۋىمداستىعى» وبلىستىق فيليالانىڭ باسشىسى بەرىك سارييەۆ، اۋىل شارۋاشىلىعى عىلىمدارىنىڭ دوكتورى ەدىگە ناسامبايەۆ، اۋىل شارۋاشىلىعى عىلىمدارىنىڭ كانديداتى الدابەرگەن نۇعمانوۆ، اۋىلدىق وكرۋگتەردىڭ اكىمدەرى، شارۋا قوجالىقتارىنىڭ باسشىلارى، اگروونەركاسىپ كەشەنىن دامىتۋعا باعدارلانعان قارجى ينستيتۋتتارىنىڭ وكىلدەرى مەن عالىمدار قاتىستى.
سەمينار الدىڭعى قاتارلى تەحنولوگيالاردى پايدالانا وتىرا اۋىل شارۋاشىلىعىن ءتيىمدى ەنگىزۋ جانە ونىمدىلىگىن كوتەرۋ سۇراقتارىن تالقىلايتىن ساراپتاۋ الاڭىنا اينالدى.
ق ر پرەزيدەنتى قاسىم-جومارت كەمەل ۇلى توقايەۆتىڭ تاپسىرماسىنا سايكەس قازىرگى تاڭدا اقتوبە وبلىسىندا اۋىل شارۋاشىلىعى مەن بيزنەستى قولداۋ شارالارىن كۇشەيتۋ جۇمىستارى جۇرگىزىلۋدە.
«بۇگىن ءبىزدىڭ الدىمىزدا اۋىل شارۋاشىلىعى سالاسىن زاماناۋي تالاپتارعا ساي ءارى قاراي دامىتۋ بويىنشا ءبىرقاتار مىندەتتەر تۇر. ولاردىڭ قاتارىندا وسى سالانىڭ مەملەكەتتىك قولداۋ شارالارىن ءتيىمدى جۇزەگە اسىرۋ مىندەتى بار. بۇل ازىق-تۇلىك قاۋىپسىزدىگىن قامتاماسىز ەتۋگە، ءونىم ساپاسى مەن ونىمدىلىك كولەمىن كوتەرۋگە، اۋىل شارۋاشىلىعى ونىمدەرىنىڭ باعاسىن تۇراقتاندىرۋعا مۇمكىندىك بەرەدى»،- دەدى سەميناردى اشقان وبلىس اكىمى.
وڭداسىن ورازالين شارۋالاردىڭ ەرەن ەڭبەكتەرىن جوعارى باعالايتىنىن اتاپ ءوتتى.
ايتا كەتەيىك، بيىل اقتوبە وبلىسىندا اۋىل شارۋاشىلىعى تاۋارلارىن وندىرۋشىلەردى قولداۋ ماقساتىندا 23،7 ملرد تەڭگە سۋبسيديا بولىنسە، ونىڭ 13،3 ملرد. تەڭگەسى اسىل تۇقىمدى مال شارۋاشىلىعىن دامىتۋعا، 7 ملرد تەڭگە مال ازىعىن دايىنداۋعا كەتتى. بۇدان بولەك، اعىمداعى جىلى اۋىل شارۋاشىلىعى تەحنيكاسىن جاڭارتۋدى ىنتالاندىرۋ ءۇشىن جەرگىلىكتى بيۋدجەت ەسەبىنەن وسى ماقساتتاردى سۋبسيديالاۋ كولەمى 25 پايىزدان 35 پايىزعا دەيىن ۇلعايتىلدى.
ناتيجەسىندە جىل باسىنان بەرى ءىرى قارا مال باسى 9،9%، جىلقى - 14% ءوستى. 270 ملرد. تەڭگەگە اۋىل شارۋاشىلىعى ءونىمى ءوندىرىلدى.
بيىلعى جىلعى قولايسىز اۋا رايى تۇراقتى مال ازىعى بازاسىن جاساۋ قاجەتتىگىن كورسەتتى. سوعان بايلانىستى اقتوبە وبلىسىندا قازىرگى تاڭدا جەمشوپتىك داقىلى كولەمىن 2023 جىلعا دەيىن ۇلعايتۋ باعدارلاماسى ازىرلەنىپ جاتىر. ول جەمشوپتىك داقىلداردى ەگۋگە بەرىلەتىن سۋبسيديانى كوبەيتۋدى جانە مال ازىعىن ازىرلەۋگە قاجەت اۋىل شارۋاشىلىعى تەحنيكاسىن ساتىپ الۋدى قاراستىراتىن بولادى. شارۋالاردىڭ وزدەرى مەملەكەت كومەگى وسى جىلى بۇرىن بولماعان دەڭگەيگە جەتكەنىن اتاپ ءوتتى.
«ءبىزدىڭ وبلىستىڭ شارۋا قوجالىقتارى اتىنان سىزگە ريزاشىلىعىمدى بىلدىرگىم كەلەدى. نەگىزىندە بىزگە ۇلكەن قولداۋ كورسەتىلەدى. مۇنداي قولداۋ ەشبىر وڭىردە جوق دەپ سەنىممەن ايتا الامىن. ءسىزدىڭ شارۋالارعا دەگەن كومەگىڭىزدى حالىققا دەگەن قامقورلىق دەپ سانايمىز».- دەدى «قازاقستان فەرمەرلەر قاۋىمداستىعى» وبلىستىق فيليالانىڭ باسشىسى بەرىك سارييەۆ.
وبلىس اكىمى جەرگىلىكتى اتقارۋشى ورگانداردىڭ الداعى ۋاقىتتا دا ءوڭىردىڭ اۋىل شارۋاشىلىعىن دامىتۋعا جان-جاقتى قولداۋ كورسەتەتىنىن ايتتى.
اقتوبە وبلىسى اكىمىنىڭ باسپا ءسوز قىزمەتى
