ق ر ۇلتتىق مۋزەيىندە قازاقستان رەسپۋبليكاسىنىڭ تۇڭعىش پرەزيدەنتى كۇنى جانە ەل تاۋەلسىزدىگىنىڭ 30 جىلدىعىنا ارنالعان «جارقىن بولاشاقتىڭ نۇرلى باستاۋى» اتتى كورمەنىڭ اشىلۋى ءوتتى.
سونىڭ ىشىندە ۇلت كوشباسشىسى، ق ر تۇڭعىش پرەزيدەنتى – ەلباسى ن.ءا. نازاربايەۆتىڭ قىزمەتى جانە ءومىر جولىمەن بايلانىستى شىنايى وقيعالارعا نەگىزدەلگەن كوركەمدىك جانە دەرەكتىك ءمانى بويىنشا بىرەگەي جادىگەر بولىپ تابىلاتىن اتاقتى سۋرەتشى نيكولاي ياكوۆليەۆيچ ترەتياكوۆتىڭ 1960 جىلى سالىنعان «ۇلكەن جول الدىندا» كارتيناسى كورەرمەن نازارىنا ۇسىنىلدى.
ءىس-شاراعا قازاقستان رەسپۋبليكاسى پارلامەنتى سەناتىنىڭ دەپۋتاتتارى نۇرتورە ءجۇسىپ، دينار نوكەتايەۆا، ايگۇل قاپباروۆا، ق ر پارلامەنتى ءماجىلىسىنىڭ دەپۋتاتى بەرىك ءابدىعالي ۇلى، قازاقستان حالقى اسسامبلەياسى ءتوراعاسىنىڭ ورىنباسارى ماييا بەكبايەۆا، بەلگىلى مەملەكەت جانە قوعام قايراتكەرلەرى، سونداي-اق زيالى قاۋىم وكىلدەرى قاتىستى.
كورمەنىڭ اشىلۋى سالتاناتىندا ۇلتتىق مۋزەي ديرەكتورى ا. مۇحامەدي ۇلى: «سۋرەتتىڭ كومپوزيسياسى ەرەكشە! ەلباسى نۇرسۇلتان ءابىش ۇلى الماتى وبلىسى شامالعان اۋىلىنا دەمالىسقا بارادى. سوندا وتباسى مۇشەلەرىمەن جانە جەرلەستەرىمەن كەزدەسەدى. دارقان دالادا جينالعان قاۋىم اراسىندا اڭگىمە ءوربيدى. ەڭبەكتە جانە قوعامدىق ىستەردە جەتكەن جەتىستىكتەر باياندالادى. جەرلەستەرى جاس بەلسەندىنىڭ اڭگىمەسىن بار ىنتاسىمەن تىڭدايدى. بۇل ءسات اۋەلى فوتووبەكتيۆكە ءتۇسىپ، كەيىن وسى تۋىندىعا ارقاۋ بولعان ەدى»، - دەدى
ءوز كەزەگىندە قازاقستان رەسپۋبليكاسى پارلامەنتى سەناتىنىڭ دەپۋتاتى نۇرتورە ءجۇسىپ كورمەنىڭ ماڭىزدىلىعىنا توقتالسا، ق ر پارلامەنتى ءماجىلىسىنىڭ دەپۋتاتى بەرىك ءابدىعالي ۇلى كورەرمەن نازارىنا ۇسىنىلعان تۋىندىنىڭ ەرەكشەلىگىن جەتكىزدى.
تاريحي شىعارمانىڭ سيۋجەتى №8 كاسىبي-تەحنيكالىق ۋچيليششەنىڭ تۇلەگى ن. نازاربايەۆتىڭ 1960 جىلى الماتى وبلىسى شامالعان اۋىلىنداعى وتباسى مۇشەلەرىمەن جانە جەرلەستەرىمەن كەزدەسۋ ساتىنە قۇرىلعان. كەزدەسۋگە بولاشاق پرەزيدەنتتىڭ قول جەتكىزگەن جەتىستىكتەرى تۋرالى باياندالعان ارنايى ماقالانىڭ «دزەرجينەس» گازەتىندە جارىق كورۋى سەبەپ بولدى.
اتالعان كارتينانىڭ ەرەكشەلىگى اۋىلداستاردىڭ قۋانىشقا تولى باسقوسۋىن بەينەلەگەن سۋرەتشىنىڭ باستى رولدەگى جاس جىگىتتىڭ كەلبەتى مەن مىنەزىنەن كورنەكتى قوعام قايراتكەرىنە ءتان بولمىسىن بايقاۋىندا. كەيىن بۇل تاريحي تۇلعانىڭ مول ەرىك-جىگەرى مەن كەمەڭگەرلىك قاسيەتتەرىنىڭ ارقاسىندا قازاقستان الەمدىك قاۋىمداستىققا تانىلىپ، ءارى ونىڭ تەڭ قۇقىلى مۇشەسى اتانىپ، تاۋەلسىز دەموكراتيالىق مەملەكەتكە اينالدى.
ق ر ۇلتتىق مۋزەيىندە وتكەن بۇل كورمەگە ۇلت كوشباسشىسى ن.ءا. نازاربايەۆتىڭ فوتوقۇجاتتارى دا قويىلدى.
پىكىر قالدىرۋ