وبلىس اكىمى وڭداسىن ورازالين 3 قىركۇيەك، جۇما كۇنى ءشيلىساي تۇرعىن الابىندا 600 ورىندى مەكتەپ قۇرىلىسىنىڭ بارىسىمەن تانىستى.
قۇرىلىسى 2018 جىلدىڭ ءساۋىر ايىندا باستالعان عيماراتتى قاراپ شىققان ءوڭىر باسشىسى جۇمىستاردى اعىمداعى جىلدىڭ سوڭىنا دەيىن اياقتاۋدى تاپسىردى.
ايتا كەتەتىن جايت، مەكتەپتىڭ ءۇشىنشى قاباتىندا الەۋمەتتىك وسال ساناتتاعى بالالارعا ارنالعان 110 ورىندىق ينتەرناتتى ورنالاستىرۋ تۋرالى شەشىم قابىلداندى.
كەيىن وبلىس اكىمى №53 ورتا مەكتەپتە دە بولدى. مەكتەپ ءبىر اۋىسىمدا 700 بالانى وقىتۋعا ارنالعان. قازىرگى ۋاقىتتا 1900 بالا ءبىلىم الۋدا. وقىتۋ ءۇش اۋىسىمدا جۇرگىزىلەدى. ماسەلە 1 قازانعا دەيىن شەشىلەدى. اتالعان ۋاقىتقا دەيىن مەكتەپكە جاپسارلاس سالىنعان قۇرىلىس جۇمىستارى اياقتالىپ، مەكتەپكە 400 وقۋشى اۋىسادى جانە وقىتۋ ەكى اۋىسىمدا جۇرگىزىلەدى. وبلىس اكىمى قۇرىلىس جۇمىستارىن قاراي كەلە، ولاردى ساپالى، تياناقتى جانە بەلگىلەنگەن مەرزىمدە اياقتاۋدى تاپسىردى.
اكىمنىڭ جۇمىس ساپارى اۋلالاردى اباتتاندىرۋ جۇمىستارىنىڭ بارىسىمەن تانىسۋمەن جالعاستى. ەستەرىڭىزگە سالا كەتەيىك، اعىمداعى جىلى وبلىس ورتالىعىندا 220 اۋلا جوندەلىپ، 67 بالالار ويىن الاڭى ورناتىلادى. وبلىس اكىمى 8 ناۋرىز، اعايىندى جۇبانوۆتار، ەسەت باتىر، ي.تۋرگەنيەۆ اتىنداعى كوشەلەردە بىرنەشە اۋلالاردى ارالادى.
مەردىگەرلىك ۇيىمداردىڭ باسشىلارى جوبالاردىڭ ىسكە اسىرىلۋى تۋرالى ەسەپ بەردى.
"8 ناۋرىز كوشەسىندە ۇزىندىعى 500 مەترگە جۋىق ءتورت اۋلا مەن اۋلالارعا كىرەبەرىس جول جوندەلۋدە. جۇمىستار جوسپار بويىنشا جۇرگىزىلۋدە، جاقىن ارادا اياقتايمىز. ءبىز اسفالت توسەيمىز، جيەكتەردى ورناتامىز، تاستاردى توسەيمىز، تۇراق ايماعىن جابدىقتايمىز. ۇزاق جىلدار ىشىندە العاش رەت اۋلالارى رەتكە كەلتىرىلىپ، مۇمكىندىگىنشە كومەك العاندارى ءۇشىن تۇرعىندار ءدان ريزا"، - دەدى" رەمگورستروي " ج ش س مەردىگەرلىك ۇيىمىنىڭ وكىلى جانىبەك قۇدايبەرگەنوۆ.
"بۇرىن مەن ءسىزدىڭ قابىلداۋىڭىزدا بولعان ەدىم. ءبىزدىڭ كوشەنى قالپىنا كەلتىرگەنىڭىز ءۇشىن راحمەت. بىزدە زەينەتكەرلەر كوپ، بارلىعى تەمىرجولشىلار، اۋلادا قارت ادامدار ءجيى سۇرىنەتىن. ەندى مۇنداي ماسەلە بولمايدى"، دەدى وبلىس اكىمىنە 80 جاستاعى 8 ناۋرىز كوشەسىنىڭ تۇرعىنى.
وڭداسىن ورازالين وسى ايدىڭ سوڭىنا دەيىن كوشەدە جارىقتاندىرۋ جۇرگىزىلەتىنىنە، ال كەلەسى جىلى ۇيلەردىڭ قاس بەتتەرىن جوندەۋ جۇمىستارى باستالاتىنىنا ۋادە بەردى.
تۋرگەنيەۆ كوشەسىندەگى ۇيلەردىڭ تۇرعىندارى دا العىس ايتتى.
"بىزدە ءقازىر كىشكەنتاي اربات بار دەپ ايتۋعا بولادى. بالالار ەمىن-ەركىن وينايدى. ءبىز اباتتاندىرۋدى، اسفالت توسەلۋىن وتە ۇزاق كۇتتىك. العىسىمىز شەكسىز"، - دەدى پيك ءتوراعاسى.
اعايىندى جۇبانوۆتار كوشەسىندە وبلىس اكىمى وسى جىلدىڭ قازان ايىندا اياقتالاتىن "جاستار اللەياسىنىڭ" جاڭارتىلعان قۇرىلىسىمەن تانىستى. ايتا كەتەيىك، اللەيا ماڭىنداعى ەكى كوپقاباتتى ۇيدە جاستارعا ارنالعان كورىكتى مۋرالدار پايدا بولادى.
ارالاۋ قورىتىندىسى بويىنشا وبلىس اكىمى قالا باسشىلىعىنا وبلىس ورتالىعىن ودان ءارى اباتتاندىرۋ بويىنشا ءبىرقاتار ناقتى تاپسىرمالار بەردى.
اقتوبە وبلىسى اكىمىنىڭ باسپا ءسوز قىزمەتى
