اقتوبەدە وبلىس اكىمى وڭداسىن ءورازاليننىڭ توراعالىعىمەن مەملەكەت باسشىسى قاسىم-جومارت توقايەۆتىڭ "حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى" اتتى جولداۋىنىڭ جۇزەگە اسىرىلۋىنا بايلانىستى جيىن ءوتتى، دەپ حابارلادى اقتوبە وبلىسى اكىمىنىڭ باسپا ءسوز قىزمەتى.

جيىنعا وبلىستىق مەملەكەتتىك ورگانداردىڭ باسشىلارى، وبلىستىق قوعامدىق كەڭەس وكىلدەرى، ارداگەرلەر قاتىستى.

وڭداسىن ورازالين جيىندى اشاردا: «الدىڭعى كۇنى مەملەكەت باسشىسى جىل سايىنعى قازاقستان حالقىنا جولداۋىمەن ءسوز سويلەدى. پرەزيدەنت ەلىمىز ءۇشىن وزەكتى بولىپ تابىلاتىن بارلىق سۇراقتى قامتىدى. نەگىزگى مىندەتتەردىڭ ءبىرى – پاندەميادان كەيىنگى كەزەڭدە ەكونوميكالىق ءوسىمدى قامتاماسىز ەتۋ» – دەپ اتاپ ءوتتى.

وبلىس اكىمى ستراتەگيالىق قۇجاتتىڭ نەگىزگى باسىمدىقتارى مەن مەملەكەت باسشىسى قويعان اۋقىمدى مىندەتتەردى ىسكە اسىرۋ جولدارىنا توقتالدى.

پرەزيدەنت تاپسىرماسىن ورىنداۋ ماقساتىندا وڭىردە COVID-19-عا قارسى ەكپە تۋرالى جالعان اقپاراتپەن كۇرەس جۇمىستارى كۇشەيتىلەتىن بولادى. ايتا كەتەيىك، بۇگىندە كوروناۆيرۋسقا قارسى ەكپەنىڭ ءبىرىنشى كومپونەنتىمەن 285 مىڭ ادام، ەكىنشىسىمەن 228 مىڭنان اسا ادام ەگىلگەن. سونداي-اق، بيۋدجەت قاراجاتىن ءتيىمدى پايدالانۋ، اۋىل اۋماقتارىن دامىتۋ جانە حالىقتىڭ قاتىسۋ بيۋدجەتىن ەنگىزۋ، كۆازيمەملەكەتتىك سەكتور كاسىپورىندارىن جەكەشەلەندىرۋ، شاعىن جانە ورتا بيزنەستىڭ دامۋىن جەدەلدەتۋ، ءبىلىم بەرۋ سالاسىن دامىتۋ جانە ت.ب. سىندى مىندەتتەر قويىلدى.

پرەزيدەنتتىڭ ازاماتتاردىڭ ءال-اۋقاتىن جاقسارتۋ بويىنشا تاپسىرماسى اياسىندا 2022 جىلدىڭ 1 قاڭتارىنان باستاپ ەڭ تومەن ەڭبەكاقى مولشەرى 42500 تەڭگەدەن 60 مىڭ تەڭگەگە دەيىن وسەدى.

وبلىس اكىمىنىڭ ءبىرىنشى ورىنباسارى رۋسلان حامباروۆتىڭ ايتۋىنشا اتالمىش شارا تابىسىن جوعالتۋىنا بايلانىستى، سونىڭ ىشىندە ءبىر جاسقا دەيىنگى بالا كۇتىمىنە بايلانىستى الەۋمەتتىك تولەم العان ازاماتتارعا تىكەلەي قاتىستى بولادى.

بۇقارالىق جانە بالالار سپورتىمەن شۇعىلدانۋعا جاعداي جاساۋ جۇمىستارى جانداندىرىلادى. بۇگىندە وبلىس تۇرعىندارىنىڭ 32،24%-ى دەنە شىنىقتىرۋمەن جانە سپورتپەن اينالىسادى. قازىرگى تاڭدا قارعالى، تەمىر اۋداندارىنىڭ اۋىلدارىنداعى جانە حرومتاۋ مەن قاندىاعاش قالالارىنداعى 5 دەنە شىنىقتىرۋ-ساۋىقتىرۋ كەشەنىنىڭ قۇرىلىسى جالعاسۋدا. بۇدان وزگە، بيىل مۇمكىندىگى شەكتەۋلى جاندارعا ارنالعان سپورت كەشەنىن جانە جارقامىس، جارلى جانە جاعابۇلاق اۋىلدارىندا انگار تيپىندەگى 3 سپورت كەشەنىن سالۋ جوسپارلانىپ وتىر. «ءسامۇرىق-قازىنا-تراستتىڭ» قولداۋىمەن مۇعالجار اۋدانىنىڭ ەمبى قالاسىنداعى بجسم جانىنان دەنە شىنىقتىرۋ-ساۋىقتىرۋ كەشەنىن سالۋ باستالدى. سونىمەن قاتار، اقتوبە قالاسىنداعى ورتالىق ستاديون مەن «حيميك» ستاديونىن قالپىنا كەلتىرۋ ءۇشىن جوبالىق-سمەتالىق قۇجاتتاما تۇزەتىلىپ جاتىر. تەك قالانى عانا ەمەس، وبلىستاعى بارلىق ءىرى اۋىلداردى سپورت عيماراتتارىمەن قامتۋ جوسپاردا بار.

سيفرلاندىرۋدى دامىتۋ اياسىندا وبلىس ورتالىعىندا 79 اپپاراتتىق-باعدارلامالىق كەشەن مەن 2600 سىرتقى بەينە باقىلاۋ كامەرالارىن ورناتا وتىرا «اقتوبە ءقاۋىپسىز قالا» ىزدەستىرۋ-ساراپتاۋ كەشەنىن ەنگىزۋ جوسپارلانۋدا. بۇل شارا تۇرعىنداردىڭ قاۋىپسىزدىگىن كوتەرۋگە، وڭىردەگى اپات پەن قىلمىس دەڭگەيىن ازايتۋعا مۇمكىندىك بەرەدى.

ايتا كەتۋ كەرەك، بۇگىندە 250 ادامنان اساتىن تۇرعىنى بار ەلدى مەكەندەردى ينتەرنەتپەن قامتۋ اياسىندا، وڭىردەگى 100 اۋىلدىڭ 98ء-ى «3G» موبيلدىك ينتەرنەتىمەن قامتىلعان، قالعان ەكى اۋىل بويىنشا جۇمىستار جۇرگىزىلۋدە.

وڭداسىن ورازالين وبلىس مەملەكەت باسشىسىنىڭ جىل سايىنعى جولداۋىندا قويىلعان ماقسات-مىندەتتەردى ورىنداۋ ءۇشىن بار كۇشىن سالاتىنىن اتاپ ءوتتى.

«ول ءۇشىن بىزدە بارلىق جاعداي بار. تەك قاتاڭ باقىلاۋدى قامتاماسىز ەتە وتىرىپ، بەرىلىپ، جاۋاپكەرشىلىكپەن جۇمىس ىستەۋ كەرەك»،- دەدى وبلىس اكىمى قاراماعىنداعىلارعا.