اگەنتتىك مالىمەتىنشە، قازىرگى ۋاقىتتا 2007-2008 جىلدارداعى الەمدىك قارجى داعدارىسىنان، سونداي-اق ۇلتتىق ۆاليۋتا باعامىنىڭ السىرەۋىنەن بارىنشا زارداپ شەككەن يپوتەكالىق قارىز الۋشىلاردىڭ جەكە ساناتىنا كومەك كورسەتۋ ءۇشىن 2015 جىلدان بەرى يپوتەكالىق قارىزداردى قايتا قارجىلاندىرۋ باعدارلاماسى ءجۇرىپ جاتىر.

باعدارلاما تالاپتارى بويىنشا قارجىلىق قولداۋ 2004-2009 جىلدار ارالىعىنداعى كەزەڭدە يپوتەكالىق قارىز العان، سونداي-اق 2016 جىلعى 1 قاڭتارعا دەيىن ۆاليۋتالىق يپوتەكالىق قارىز العان قارىز الۋشىلارعا كورسەتىلەدى.

"باعدارلامادا بەلگىلەنگەن قارجىلاي كومەك شارالارى جالعىز باسپاناسى بار قارىز الۋشىلار جانە حالىقتىڭ الەۋمەتتىك وسال توپتارى ساناتىنداعى بورىشكەرلەر ءۇشىن پايىزدىق مولشەرلەمەنى 3%-عا دەيىن تومەندەتۋدى كوزدەيدى. قالعان ۆاليۋتالىق يپوتەكالىق قارىز الۋشىلار ءۇشىن پايىزدىق مولشەرلەمە 12%-دان اسپايدى. بۇدان باسقا، باعدارلاما شەڭبەرىندە سىياقى، ايىپاقى (ءوسىمپۇل، ايىپپۇلدار) جانە كوميسسيالار بويىنشا مەرزىمى وتكەن بەرەشەك ەسەپتەن شىعارىلدى. ۆاليۋتالىق يپوتەكالىق قارىزدارعا قاتىستى بەرەشەكتى ۇلتتىق بانكتىڭ 2015 جىلعى 18 تامىزداعى باعامى بويىنشا (1 اقش دوللارى ءۇشىن 188،35 تەڭگە) تەڭگەگە كونۆەرتاسيالاۋ جۇرگىزىلدى دەلىنگەن اگەنتتىك حابارلاماسىندا.

اگەنتتىك 2020 جىلعى قاڭتاردان باستاپ باعدارلاماعا قاتىساتىن حالىقتىڭ الەۋمەتتىك وسال توپتارى ساناتىنداعى يپوتەكالىق قارىز الۋشىلار ءۇشىن قوسىمشا كومەك شارالارى ىسكە اسىرىلىپ جاتقانىن ايتادى.

"مۇنداي قارىز الۋشىلارعا قولداۋدى بانكتەر ولاردىڭ قارجىلىق جانە الەۋمەتتىك جاعدايىن جان-جاقتى تالداۋ نەگىزىندە جەكە تارتىپپەن كورسەتۋدە، تالداۋ ناتيجەلەرىنەن كەيىن بانكتەر قارىز بويىنشا بەرەشەكتى تومەندەتۋ جانە 20 000 تەڭگە مولشەرىندەگى اي سايىنعى تولەممەن جەڭىلدىك بەرىلگەن كەستەلەر بەلگىلەۋ تۋرالى شەشىم قابىلدايدى. قارىز الۋشىلاردىڭ بۇل ساناتىنا قولداۋ كورسەتۋ 2021 جىلدىڭ سوڭىنا دەيىن اياقتالادى" دەگەن مەكەمە ازاماتتاردى رەسمي ءارى تەكسەرىلگەن دەرەككوزدەردەن تاراتىلعان اقپاراتقا سەنۋگە شاقىردى.

سونداي-اق اقپاراتتىق حابارلامادا كرەديتتىك راقىمشىلىقتى جۇرگىزۋ زاڭنامالىق تۇردە كوزدەلمەگەنى، اگەنتتىكتە حالىقتىڭ كرەديتتەر بويىنشا بەرەشەگىن ەسەپتەن شىعارۋ بويىنشا شەشىم قابىلداۋ وكىلەتتىكتەرى جوق ەكەنى ايتىلادى.

بۇعان دەيىن نەسيە امنيستياسىن جاريالاۋدى تالاپ ەتىپ جۇرگەن بەلسەندى، دەموكراتيالىق پارتيا ىنتالى توبىنىڭ جەتەكشىسى جانبولات ماماي قارجى نارىعىن رەتتەۋ جانە دامىتۋ اگەنتتىگى عيماراتىنىڭ الدىندا ءبىر ايەلدىڭ "ەكى كرەديتىم كەشىرىلدى" دەپ ايتقانىنىڭ ۆيدەوسىن جاريالاعان.