اقتوبە وبلىسى ءماسليحاتىنىڭ دەپۋتاتى بورەحان بەركىمبايەۆ كولىكپەن مەكتەپ وقۋشىسىن قاعىپ مەرت قىلعان بالاسىنىڭ ارەكەتىن اقتامايتىنىن ايتتى، دەپ جازادى "دياپازون" باسىلىمى.

دەپۋتات ءوزىنىڭ لاۋازىمى بالاسىنا قاتىستى تەرگەۋگە اسەر ەتپەيتىنىن ايتادى.

– بۇل جاعداي – وتباسى ءۇشىن ورنى تولماس تراگەديا. كولىك رولىندە ۇلىم وتىرعانى راس. وقيعانىڭ ەرتەڭىندە قارالى وتباسىعا كوڭىل ايتىپ، شىن پەيىلىممەن جانازاعا قاتىستىم. ۇلىمدى اقتاۋعا تىرىسپادىم. ول كىنالى، سول ءۇشىن زاڭعا ساي جاۋاپ بەرۋگە ءتيىس. ءقازىر ول تەرگەۋ يزولياتورىندا وتىر. مەن ۇلىمدى اقتامايمىن، تەك الەۋمەتتىك جەلىدە جازىلىپ جاتقان ءتۇرلى اڭگىمەگە قاتىستى ايتارىم بار. ۇلىم سول كەشتە جاتتىعۋعا بارا جاتقان. ىشىمدىك ىشپەگەن، ەسىرتكى قولدانباعان. ونىڭ ءبارىن ساراپتاما راستاپ وتىر. ينتەرنەتتە جازىپ جاتقانداي، ەشكىممەن جارىسپاعان. ۇلىم سالماقتى ادام. جۇمىسى، ءۇش بالاسى بار. كولىگى ەسكى بولاتىن، ونى قولدان العانبىز. اۆاريادان كەيىن ەشقايدا قاشىپ كەتپەي، بىردەن جەدەل جاردەم شاقىردى. ول ءوز كىناسىن 100 پايىز مويىندايدى، زاڭعا سايكەس جازالانادى دا. مەن ۇلىن جوعالتقان اۋلەتتىڭ قايعىسىن تۇسىنەمىن، ونىڭ ورنىن تولتىرۋ مۇمكىن ەمەس. تەك بۇلاي بولعانىن ەشكىم قالاماعانىن، مۇندايدان ەشكىم ساقتاندىرىلماعانىن عانا ايتقىم كەلەدى. مەنىڭ دەپۋتات ەكەنىم تەرگەۋ بارىسىنا اسەر ەتپەيدى. بۇل كەرىسىنشە قيىنداتا تۇسەدى. مۇنداي جاعدايدى ەشكىمنىڭ باسىنا تىلەمەيمىن، –  دەيدى دەپۋتات.

3 جەلتوقساندا اقتوبەدە جۇرگىنشىلەرگە ارنالعان جولدا "Land Cruiser Prado" اۆتوكولىگى 15 جاستاعى بالانى قاعىپ مەرت قىلعان. كولىك رولىندە وبلىستىق ءماسليحات دەپۋتاتى بورەحان بەركىمبايەۆتىڭ بالاسى وتىرعان.

قازىرگى ۋاقىتتا كۇدىكتىگە قاتىستى قىلمىستىق كودەكستىڭ 345-بابى 3-بولىگى (ابايسىزدا ادام ولىمىنە اكەپ سوققان جول-كولىك وقيعاسى) بويىنشا ءىس قوزعالعان.