5 جەلتوقسان كۇنى الماتىدا تاۋەلسىزدىكتىڭ 30 جىلدىعىنا وراي VIII حالىقارالىق ماتەماتيكا، فيزيكا جانە ينفورماتيكا مۇعالىمدەرىنىڭ فورۋمى ءوتتى. جيىنعا اسقار جۇمادىلدايەۆ، مۇحتار وتەلبايەۆ، قايروش ماكىشيەۆ سەكىلدى بەلگىلى ماتەماتيكتەر جانە ءماجىلىس دەپۋتاتى يرينا سميرنوۆا قاتىستى.

فورۋمدا ءسوز العان ماماندار ءبىلىم بەرۋ سالاسىنداعى پاندەميادان كەيىنگى قوردالانعان پروبلەمالاردى كوتەردى. اتاپ ايتقاندا، وقۋشىلاردىڭ پسيحولوگياسىنداعى وزگەرىستەر، ونلاين ءبىلىم بەرۋدەگى مەملەكەتتىك تاپسىرىستىڭ ءبولىنۋى، ۇشتىلدىلىك، ءبىلىم بەرۋ سالاسىنداعى رەفورمالاردىڭ تيىمدىلىگى تۋرالى ءسوز قوزعادى. سونداي-اق تاۋەلسىزدىكتىڭ 30 جىلدىعىنداعى ءبىلىم جۇيەسىنىڭ جەتىستىكتەرى مەن كەمشىلىكتەرى، وقۋشىلار اراسىنداعى تەڭسىزدىكتەر، Edtex سالاسىنداعى يننوۆاسيا تاقىرىپتارى تالقىلاندى. فورۋمعا جينالعان مۇعالىمدەر دە وسى ماسەلەلەر بويىنشا ءوز ويىن ورتاعا سالىپ، ۇسىنىستارىن ءبولىستى. جيىندا كوتەرىلگەن ماسەلەلەر مەن ۇسىنىستار جۇيەلەنىپ، «ماتەماتيكا پاندەرى مۇعالىمدەرى قاۋىمداستىعى» اتىنان ءبىلىم جانە عىلىم مينيسترلىگىنە جولداناتىنى ايتىلدى.

ۇيىمداستىرۋشىلاردىڭ ايتۋىنشا، فورۋمدى وتكىزۋدەگى نەگىزگى ماقسات - ماتەماتيكا ءپانى مۇعالىمدەرىن قولداۋ، ىنتالاندىرۋ جانە تاجىريبە الماسۋ، سالا وكىلدەرىن كاسىبي الاڭعا جيناۋ، قازاقستاننىڭ ماتەماتيكالىق ءبىلىمىن الەمدەگى جەتەكشى ورىنعا شىعارۋ. اتالمىش شارا اياسىندا فيزيكا، ماتەماتيكا جانە ينفورماتيكا ءپانى مۇعالىمدەرى اراسىندا پاندىك بايقاۋ ءوتتى. قازاقستان ماتەماتيكا ءپانى مۇعالىمدەرى اسسوسياسياسىنىڭ ديرەكتورى قايروش ماكىشيەۆ تاپسىرمالاردىڭ كۇردەلى ەكەنىن جەتكىزدى.

- ەسەپ ەكى بولىكتەن تۇرادى. ءبىرىنشى بولىگىندە ءتۇرلى باعىتتاعى كۇردەلى ەسەپتەر بەرىلدى. ال ەكىنشى بولىگىندەگى ەسەپتەر شىعارماشىلىق باعىتىندا بولدى. بۇل ەسەپتەردىڭ شارتىنا ادەيى وزگەرتۋ ەنگىزدىك جانە وقۋشىلاردىڭ قاتە شىعارعان ەسەبىن ۇسىندىق. جارىس قاتىسۋشىلارى وقۋشىنىڭ قاتەسىن تاۋىپ، تۇزەتۋ ەنگىزۋى قاجەت، - دەدى قايروش بەكسەيىت ۇلى.

فورۋم سوڭىندا ۇزدىك مۇعالىمدەر انىقتالىپ، جەڭىمپازدار باعالى سىيلىقتارمەن جانە ق ر بعم ديپلومىمەن ماراپاتتالدى.