الماتىدا «مەيىرىم مەكەنى» ءۇيى اشىلدى. بۇل – قالاداعى كوپبالالى انالار مەن الەۋمەتتىك جاعدايى تومەن وتباسىلارعا كومەك كورسەتۋ ماقساتىندا ىسكە اسقان جوبا. سونىڭ ناتيجەسىندە 50 وتباسى 5 جىل بويىنا تەگىن پاتەردە تۇرۋعا مۇمكىندىك الدى. ونداعى كوممۋنالدىق شىعىن مەن جالدامالى پاتەر اقىسىن كاسىپكەرلەر ءوز مويىندارىنا العان. وسىلايشا، الەۋمەتتىك ساناتتاعى جانۇيالارعا جاعدايىن تۇراقتاپ، بولاشاقتا ءوز باسپانالارىنا اقشا جيناۋعا مۇمكىندىك تۋىپ وتىر، دەپ حابارلادى ازاتتىق رۋحى باسىلىمى.

باسپانالى بولعاندار قاتارىندا مەيرامگۇل پالمانوۆا دا بار. بۇعان دەيىن پاتەردەن پاتەرگە كوشىپ، كورىنگەننىڭ بوساعاسىن جاعالاپ جۇرگەن كوپبالالى وتباسى جاڭا ۇيگە قونىستاندى. وتاعاسى بىرنەشە جىل بۇرىن دۇنيەدەن وتكەن. ءوزى جالدامالى جۇمىس ىستەيدى. العان ايلىعى شايلىعىنان اسپايتىن ايەل ءۇشىن قايىرىمدى جاندار سىيلاعان باسپانا ەڭ ۇلكەن قۋانىش.

«وتە قۋانىشتىمىن. وسى جوباعا شاقىرىپ، بىزگە ءۇي بەرگەن ءمارياش دەگەن كىسىگە شەكسىز ريزامىن. قانشا ارمانداساق تا، بۇل ارمانىما جەتەمىن دەپ ەڭبەكتەنىپ، ءۇي الا الماي جۇرگەنبىز. مۇندا تەگىن تۇرامىز. سول ارالىقتا ءبىراز اقشا جيناپ، ءوز ءۇيىمىزدى الامىز. بالالارىم ءۇشىن قۋانىشتىمىن. بارىنەن بۇرىن 4 بالام كوڭىلدەنىپ قالدى. ەندى ساباقتارىن جىلى، جارىق ءارى جايلى جەردە وقيدى»، – دەيدى كوپبالالى انا.

بارلىعى 50 وتباسىعا ارنالعان ەكى قاباتتى ءۇيدىڭ قۇرىلىسى 3 جىل جۇرگەن.

الەۋمەتتىك جوبا تولىقتاي كاسىپكەرلەردىڭ قولداۋىمەن جۇزەگە اسقان. ولار تەك ءۇي سالىپ بەرۋمەن عانا شەكتەلمەي، الداعى ۋاقىتتا ازىق-تۇلىك پەن كيىم-كەشەك تۇرعىسىنان دا كومەكتەسەتىنىن ايتادى.

«اكەم ۇيسىز-كۇيسىز جۇرگەن جانداردى بۇرىن ۇيىمىزگە اكەلىپ باعاتىن، بىرەۋلەردەن سونداي وتباسىلار ەكەن دەسە، سولاردى ۇيگە اكەلىپ، كومەكتەسەتىن. مەنىڭ اكەم – سوعىس ارداگەرى. ءبىز دە مۇقتاج جاندارعا كومەك بەرۋدى ءجون كوردىك. ول بىزگە بۇرىننان قانىمىزعا سىڭگەن قاسيەت، اتا-بابالارىمىز ءاردايىم جۇرتقا قامقور بولعان ەكەن»، – دەدى وسى جوبا جۇزەگە اسىرعان ءمارياش سەرىكباي قىزى.

كاسىپكەرلەردىڭ ايتۋىنشا، بۇل ءۇي تولىقتاي تۇرعىندار مەنشىگىنە وتكىزىلمەيدى. الداعى 5 جىلعا كەلىسىمشارتقا وتىرىپ، جوبا الەۋمەتتىك قولداۋ ماقساتىندا جۇزەگە اسادى. باستاپقى كەزدە كوممۋنالدىق تولەمدەر، كەرەك بولسا، ازىق-تۇلىكتەرىنە دە كومەك بەرىلەدى. مۇندا كەلەتىندەر الدىن الا ارنايى كوميسسيانىڭ سۇزگىسىنەن ءوتىپ، جاعدايى وتە تومەن وتباسىلارعا عانا بەرىلەدى. بۇگىن ارنايى كوميسسيا قاراۋىنان وتكەن 6 وتباسىعا پاتەر كىلتى تابىستالدى. ەكى بولمەدەن تۇراتىن، بارلىق جيھازدارمەن جابدىقتالعان جانە جۋىنۋ بولمەسى بار پاتەرلەرگە جاقىن ارادا وزگە تۇرعىندار دا شەتىنەن قونىستانادى، دەيدى كاسىپكەرلىكتىڭ الەۋمەتتىك جاۋاپكەرشىلىگى ءۇشىن قولعا الىنعان جوبا جەتەكشىلەرى.