زەينەتكەرلىك جاسقا جەتكەن جانە زەينەتاقى جيناقتارى بار ادامدار بەلگىلەنگەن كەستە بويىنشا بجزق-دان تولەمدەر الۋعا قۇقىلى. بۇل تۋرالى بجزق باسپا ءسوز قىزمەتى حابارلادى.
"زەينەت جاسىنا تولۋىنا بايلانىستى بجزق-دان زەينەتاقى تولەمدەرىن تاعايىنداۋ ءۇشىن الۋشىلار تۇرعىلىقتى جەرى بويىنشا "ازاماتتارعا ارنالعان ۇكىمەت" مەملەكەتتىك كورپوراسياسىنىڭ (حقكو) بولىمشەلەرىنە ۋاقتىلى جۇگىنۋلەرى قاجەت. زەينەتاقى تولەمدەرى ءوتىنىش بەرىلگەن كۇننەن باستاپ تاعايىندالادى جانە زەينەتاقى جيناقتارى تاۋسىلعانشا جۇزەگە اسىرىلادى" دەلىنگەن حابارلامادا.
مەرزىمسىز بولىپ بەلگىلەنگەن ءبىرىنشى جانە ەكىنشى توپتاعى مۇگەدەكتىگى بار سالىمشىلارعا بجزق-دان زەينەتاقى تولەمدەرىن تاعايىنداۋ ءۇشىن الۋشىلار بجزق-نىڭ وڭىرلىك بولىمشەلەرىنە، نەمەسە ەلەكتروندىق سيفرلىق قولتاڭباسى بولعان جاعدايدا بجزق-نىڭ ينتەرنەت-سايتى ارقىلى (www.enpf.kz) ءوتىنىش قالدىرۋى قاجەت.
"زەينەتاقى تاعايىنداۋ تۋرالى وتىنىشپەن بىرگە حقكو-عا قۇجاتتاردى زەينەت جاسىنا جەتۋگە 10 كۇن قالعاندا بەرۋگە بولادى. وسىعان بايلانىستى اعىمداعى جىلى 60 جاسقا تولعان، تۋعان كۇنى 31 جەلتوقسانعا (قوسا العاندا) دەيىنگى ايەلدەردەن 2021 جىلدىڭ سوڭىنا دەيىن حقكو-عا جۇگىنۋىن سۇرايمىز، ويتكەنى 2022 جىلدىڭ 1 قاڭتارىنان باستاپ ايەلدەر ءۇشىن زەينەتكە شىعۋ جاسى 60،5 جاسقا دەيىن ۇلعايادى" دەلىنگەن تاراتقان اقپاراتتا.
بجزق مىندەتتى زەينەتاقى جارنالارى جانە مىندەتتى كاسىپتىك زەينەتاقى جارنالارى ەسەبىنەن قالىپتاستىرىلعان بجزق-دا زەينەتاقى جيناقتارى بار جانە جالپىعا بىردەي بەلگىلەنگەن زەينەت جاسىنا تولعان ادامداردىڭ (ەرلەر 63 جاسقا تولعاندا، ايەلدەر 2021 جىلى 60 جاسقا تولعاندا، ايەلدەردىڭ زەينەتكەرلىك جاسىن جىل سايىن 2027 جىلى 63 جاسقا تولعانعا دەيىن جارتى جىلعا ۇلعايتا وتىرىپ)، سونداي-اق مۇگەدەكتىگى مەرزىمسىز بولىپ بەلگىلەنگەن ءبىرىنشى جانە ەكىنشى توپتاعى مۇگەدەكتىگى بار ادامداردىڭ، بەكىتىلگەن كەستە بويىنشا بجزق-دان زەينەتاقى تولەمدەرىن الۋعا قۇقىعى بار ەكەنىن ەسكە سالادى.
پىكىر قالدىرۋ