بۇگىن اتىراۋدا 145 ميلليون تەڭگەلىك ەسكەرتكىش سالتاناتتى تۇردە اشىلۋى كەرەك. اتىراۋ وبلىسى اكىمىنىڭ باسپا ءسوز قىزمەتى بۇعان دەيىن وسىلاي دەپ حابارلاعان.
بيۋدجەت قارجىسىنىڭ جۇمسالۋى تۋرالى جازاتىن رrotenge جوباسى ەسكەرتكىش اينالاسىنداعى داۋعا قاتىستى تىڭ دەرەك جاريالادى.
جوبا مالىمەتىنشە، وسىدان ەكى جىل بۇرىن تۋرا وسىنداي ەسكەرتكىش پاۆلوداردا تۇرعىزىلعان. ەسكەرتكىشتى اتىراۋداعى داۋلى ىستە اتى اتالعان مەردىگەر – "بالقىتۋ" ج ش س جاساعان. الايدا ول جولى جوبا قۇنى شامامەن ءۇش ەسە ارزانعا – 55 ميلليون تەڭگەگە باعالانعان. ال اتىراۋدا اشىلاتىن ەسكەرتكىش سمەتاسى 145 ميلليون تەڭگەگە تەڭ.
قولادان جاسالعان ەسكەرتكىشتىڭ بيىكتىگى – 11 مەتر (تۇعىرى– 5،75 مەتر)، سالماعى – 5 توننا.
10 جەلتوقساندا اتىراۋ وبلىسى اكىمىنىڭ ورىنباسارى باقىتگۇل حامەنوۆا مەن وبلىستىق مادەنيەت باسقارماسىنىڭ باسشىسى اقىلبەك رىسقالييەۆ اباي ەسكەرتكىشىن ورناتۋعا مەملەكەتتىك ساتىپ الۋ شارتىن جاساعانى ءۇشىن 4،5 ميلليون تەڭگە كولەمىندە پارا الدى دەگەن كۇدىكپەن ۇستالعان.
حامەنوۆا 12 جەلتوقساندا ءۇيقاماققا جىبەرىلىپ، الايدا 22 جەلتوقساندا تەرگەۋ يزولياتورىنا ەكى ايعا قامالعان.
ەگەر ب.حامەنوۆانىڭ قىلمىسى دالەلدەنسە، ونىڭ مۇلكى تاركىلەنىپ، 7 جىلدان 12 جىلعا دەيىن باس بوستاندىعىنان ايىرىلۋى مۇمكىن.
ەكس-شەنەۋنىك حامەنوۆا ءمانساپ جولىندا بىردەن ورلەپ، قاراپايىم كوللەدج ديرەكتورىنان دەپۋتات بولىپ كەتكەنىن نۇرسۇلتان نازاربايەۆتى ماقتاعان ارەكەتىمەن بايلانىستىراتىندار كوپ. ول 2016 جىلى 30 قاڭتاردا كاسپيي ءوڭىرىنىڭ قازىرگى زامانعى كوللەدجىنىڭ ديرەكتورى بولىپ تۇرعان كەزدە "Nur Otan" پارتياسىنىڭ كەزەكتەن تىس حVII سەزىندە ەلباسىعا العىس ايتىپ، ولەڭ وقىعان.
"كوكجيەكتەن ارعى جاقتى كورەتىن،
ەل-جۇرتىنا شەكسىز قۋات بەرەتىن.
سوقساداعى زامانانىڭ داۋىلى،
بارشا حالقى تەك سوڭىنان ەرەتىن.
ەلباسىنداي ەرەن تۇلعا تۇرعاندا،
مەن ەلىمنىڭ ەرتەڭىنە سەنەمىن" دەگەن شۋماقتاردان كەيىن ۇزاماي 24 ناۋرىزدا حامەنوۆا ءماجىلىس دەپۋتاتى اتانادى.
ال 2020 جىلعى 13 ناۋرىزدا اتىراۋ وبلىسى اكىمىنىڭ ورىنباسارى لاۋازامىنا تاعايىندالعان.
پىكىر قالدىرۋ