ءبىلىم جانە عىلىم ءمينيسترى اسحات ايماعامبەتوۆ 2022 جىلى ەرەكشە ءبىلىم بەرۋ قاجەتتىلىكتەرى بار تالاپكەرلەرگە ۇبت تاپسىرۋ ءۇشىن قوسىمشا ۋاقىت بەرىلەتىنىن مالىمدەدى.

– كەلەسى جىلى كورۋ، ەستۋ، تىرەك-قيمىل اپپاراتىنىڭ فۋنكسيالارى بۇزىلعان وقۋعا تۇسۋشىلەر نەگىزگى 240 مينۋتتان باسقا تەستىلەۋ تاپسىرمالارىن ورىنداۋ ءۇشىن قوسىمشا 40 مينۋت الادى. ياعني، ولار ۇبت - نى باسقالارعا قاراعاندا ۇزاعىراق - 4 ساعات 40 مينۋت ىشىندە تاپسىرا الادى، – دەدى مينيستر.

ۇلتتىق تەستىلەۋ ورتالىعىنىڭ ديرەكتورى رۋسلان ەمەلبايەۆتىڭ سوزىنشە، ەرەكشە قاجەتتىلىكتەرى بار تالاپكەرلەرگە ارنالعان تاپسىرمالاردىڭ مازمۇنىنا دا وزگەرىستەر ەنگىزىلەدى.

​– ءبىز ءۇشىن جۇمىستىڭ ەڭ باستى باعىتى تالاپكەرلەردىڭ مۇددەلەرى بولىپ تابىلادى. ءبىز ۇبت-نى جىلىنا بىرنەشە رەت وتكىزەمىز. جانە دە تالاپكەرلەردىڭ، سونىڭ ىشىندە ەرەكشە ءبىلىم بەرۋ قاجەتتىلىكتەرى بار تالاپكەرلەردىڭ تەستىلەۋدى ىڭعايلى تاپسىرۋى ءۇشىن جاعداي جاساۋدى جالعاستىرامىز. ولار ءۇشىن ۇبت تاپسىرۋ ۋاقىتى تاعى 40 مينۋتقا ۇزارتىلادى. ەرەكشە قاجەتتىلىكتەرى بار تالاپكەرلەرگە ارنالعان تاپسىرمالاردىڭ مازمۇنىنا دا وزگەرىستەر ەنگىزىلەدى. ولار ءۇشىن سىزبالارسىز، دياگراممالارسىز تەست نۇسقالارى جاسالدى. وسىعان دەيىن ءبىلىم جانە عىلىم ءمينيسترى ا.ايماعامبەتوۆ بىزگە وسىنداي تاپسىرما بەرگەن بولاتىن. بۇل وزگەرىستەر ولار ءۇشىن ۇبت - دان ءوتۋدى ايتارلىقتاي جەڭىلدەتەدى، — دەپ اتاپ ءوتتى رۋسلان ەمەلبايەۆ.

سونداي-اق تەستىلەۋدى تاپسىرۋ كەزىندە اشىقتىق قاعيداتى قامتاماسىز ەتىلەدى. كەلەسى جىلى تەستىلەۋ "1 كومپيۋتەر - 2 كامەرا - 1 تەستىلەنۋشى" قاعيداتى بويىنشا جۇرگىزىلەدى.

وقۋعا ءتۇسۋشىنىڭ جۇمىس ورنىندا نەگىزگى كامەرادان باسقا، تەستىلەنۋشىنىڭ دىبىسىن جازۋ جانە قوزعالىسىن تىركەۋ ءۇشىن قوسىمشا الدىڭعى ۆەب-كامەرا ورناتىلادى.

فرونتالدى ۆەب-كامەرا وقۋعا ءتۇسۋشىنىڭ جەكە باسىن سايكەستەندىرۋگە جانە ۇبت كەزىندە بوگدە ادامداردىڭ كىرۋىن بولدىرماۋعا مۇمكىندىك بەرەدى.

ايتا كەتەيىك، 2022 جىلى ۇبت ەلەكتروندى فورماتتا وتەدى. وقۋعا تۇسۋشىلەر ءداستۇرلى تۇردە 3 مىندەتتى ءپاندى (قازاقستان تاريحى، ماتەماتيكالىق ساۋاتتىلىق، وقۋ ساۋاتتىلىعى) جانە 2 بەيىندى ءپاندى تاپسىرادى.