ستراتەگيالىق جوسپارلاۋ جانە رەفورمالار اگەنتتىگىنىڭ ءتوراعاسى قايرات كەلىمبەتوۆ قازاقستان ىقتيمالدى اتوم ەلەكتر ستانسياسى قۇرىلىسىنا بايلانىستى كەلىسسوز باستاعانىن، كەلىسسوز جۇرگىزۋشىلەر اراسىندا رەسەيلىك "روساتوم" كورپوراسياسى دا بارىن ايتتى. بۇل تۋرالى ول رەسەيلىك كوممەرسانت باسىلىمىنا بەرگە سۇحبات بارىسىندا ءمالىم ەتتى.
كەلىمبەتوۆ قازاقستان كومىرتەكتىك ەنەرگيا ۇلەسىن تومەندەتىپ، 2060 جىلعا دەيىن كومىرتەكتى بەيتاراپتىققا قول جەتكىزۋگە ءتيىس ەكەنىن ايتا كەلە اتوم ەلەكتر ستانسياسىن سالۋدىڭ قاجەتتىگىن اتاپ ءوتتى.
– ءبىز گلازنو كەلىسىمىنە ساي 2030 جىلعا دەيىن كومىر قىشقىل گازى ءبولىنۋىن 15 پايىزعا تومەندەتۋىمىز كەرەك. ول ءۇشىن كۇن مەن جەل ەنەرگياسىنا قوسىمشا ينۆەستيسيا تارتۋ قاجەت. الايدا بۇل كومىردى تولىق الماستىرا المايدى. كەي جاعدايدا گاز دا قاجەت. ءبىراق قازاقستانعا اتوم ەلەكتر ستانسياسىن سالۋعا تۋرا كەلەتىن شىعار. ءبىز كەلىسسوزدەرگە كىرىسىپ كەتتىك. ونىڭ اراسىندا "روساتوم" دا بار. قىسقاسى دەكاربونيزاسيا – كومىردەن باس تارتۋ عانا ەمەس، دەكاربونيزاسيا ەنەرگەتيكالىق مودەلدىڭ ەسكى تۇرىنەن جاڭاسىنا ءوتۋدى بىلدىرەدى، – دەدى ول.
بۇعان دەيىن "سامۇرىق-قازىنا" ۇلتتىق ءال-اۋقات قورىنىڭ باسقارما ءتوراعاسى الماسادام ساتقالييەۆ اتوم ەلەكتر ستانسياسىن سالۋعا ىڭعايلى ورىن رەتىندە الماتى وبلىسى جامبىل اۋدانىنا قارايتىن بالقاش كولىنىڭ وڭتۇستىك-باتىس بولىگىندەگى ۇلكەن كەنتى بەلگىلەنىپ وتىرعانىن حابارلاعان.
سونداي-اق ول اتوم ەلەكتر ستانسياسىنا قاجەتتى قۇرال-جابدىقتاردى شىعاراتىن كاسىپورىنداردان، اتاپ ايتقاندا رەسەي، جۇڭگو مەن فرانسيادان، اقش ەلدەرى وندىرۋشىلەرىنەن ۇسىنىستار تۇسكەنىن، شەشىم قابىلداعاندا تەحنولوگيالاردىڭ قاۋىپسىزدىگى، سونىڭ نەگىزىندە قانشا اتوم رەاكتورلارى سالىندى، باعاسى جانە تاعى باسقا ماسەلەلەر ەسكەرىلەتىنىن جەتكىزگەن.
قازاقستاندا بىرنەشە جىلدان بەرى اتوم ەلەكتر ستانسياسىن سالۋ يدەياسى كوتەرىلىپ كەلەدى. ەنەرگەتيكتەر اەس قاجەتتىلىگىن ەنەرگەتيكالىق تاپشىلىقپەن تۇسىندىرەدى. پرەزيدەنت ق.توقايەۆ بيىلعى جولداۋىندا 2030 جىلدارعا قاراي قازاقستاندا ەلەكتر ەنەرگياسىنىڭ تاپشىلىعى بولاتىنىن ايتقان.
الايدا قوعامدا اەس سالۋعا قارسى كوڭىل-كۇي باسىم. ارىس قالاسى، جامبىل وبلىسىنداعى اسكەري قويمالاردا بولعان جارىلىستان كەيىن اەس سالۋ يدەياسىنا دەگەن تەرىس كوزقاراس ارتا تۇسكەن. ازاماتتار اراسىندا ەكى جىلدا ەكى بىردەي جويقىن جارىلىسقا جول بەرىپ قويعان ۇكىمەتتىڭ ارەكەتىنە كۇمانمەن قارايتىندار باسىم. "اەس سالىپ، سوڭى ۇلكەن قايعىلى جاعدايعا ۇرىندىرىپ جۇرمەسىنە كىم كەپىل" دەگەن مازمۇنداعى پىكىرلەر ءجيى ايتىلادى.
DEMOSCOPE قوعامدىق پىكىرگە جەدەل مونيتورينگ جۇرگىزۋ بيۋروسى جۇرگىزگەن "قازاقستاندىقتاردىڭ اەس قۇرىلىسى تۋرالى پىكىرى" ساۋالناماسىنا قاتىسۋشىلاردىڭ 55%-ى اتوم ەلەكتر ستانسياسىنىڭ سالىنۋىنا قارسى ەكەنىن ايتقان.
پىكىر قالدىرۋ