ەنەرگەتيكا ءمينيسترى ماعزۇم مىرزاعالييەۆ جوسپاردان تىس وتكىزىلگەن باسپا ءسوز ءماسليحاتىندا قازاقستانداعى گاز باعاسىنىڭ قىمباتتاۋىنا قاتىستى تۇسىنىكتەمە بەردى.
باسپا ءسوز ءماسليحاتى اقتاۋ مەن جاڭاوزەندەگى نارازىلىقتارعا بايلانىستى ۇيىمداستىرىلدى.
ءمينيستردىڭ ايتۋىنشا، قازاقستاندا سۇيىتىلعان مۇناي گازىنىڭ باعاسى ورتا ازياداعى ەڭ تومەنگى باعالاردىڭ ءبىرى. بۇل – ءوندىرۋشى كومپانيالار ءۇشىن كەدەرگى، باعا تومەن بولسا، گاز ءوندىرىسى وسپەيدى. 2020 جىلى گازدىڭ ىشكى تۇتىنۋ كولەمى 1،4 ميلليون توننانى قۇراعان. 2021 جىلى ىشكى نارىقتا سۇيىتىلعان گازدى تۇتىنۋ 1،6 ميلليون تونناعا دەيىن وسكەن. بۇل رەتتە گاز ءوندىرۋ وسپەيدى، ال توزعان زاۋىتتاردىڭ ءجيى جوندەلۋى سۇيىتىلعان گاز جالپى ءوندىرىسىنىڭ تومەندەۋىنە الىپ كەلەدى، دەپ اتاپ ءوتتى مينيستر.
سۇيىتىلعان گاز باعاسىنىڭ قىمباتتاۋىنا قاتىستى ەنەرگەتيكا ءمينيسترى مىناداي تۇسىنىكتەمە بەردى.
- گاز باعاسىنىڭ وسۋىنە بىرنەشە فاكتور سەبەپ دەيدى.
- 1 قاڭتاردان باستاپ سۇيىتىلعان گاز ەلەكتروندى ساۋداعا ءوتتى، سوندىقتان باعاسى جانار-جاعارماي بەكەتتەرىنە جەتكەنشە ليترىنە 120 تەڭگە بولعان؛
- سوڭعى 2 جىلدا گازبەن جۇرەتىن كولىك 2 ەسەگە ارتقان، بۇل تاپشىلىققا اكەلۋدە؛
- ماڭعىستاۋداعى كولىكتىڭ 70% گازبەن جۇرەدى؛
- گاز وڭدەۋشى زاۋىتتار ابدەن ەسكىرگەن، سوندىقتان شىعاتىن ءونىم ازايىپ كەلەدى؛
- گازدىڭ قازىرگى زاۋىتتان شىعىپ جاتقان وزىندىك قۇنى ليترىنە 136 تەڭگە شاماسىندا؛
ايتا كەتەيىك، 2022 جىلعى 1 قاڭتادان باستاپ جاڭاوزەندە "كوگىلدىر" وتىن باعاسى كەنەتتەن 120 تەڭگەگە دەيىن وسكەن. تۇرعىندار كەشەلى بەرى گاز باعاسىن 60 تەڭگەگە دەيىن ءتۇسىرۋدى بەيبىت تۇردە تالاپ ەتۋدە.
پرەزيدەنت قاسىم-جومارت توقايەۆ جاڭاوزەندەگى جاعدايدى ەكونوميكالىق تۇرعىدان ەسكەرىپ، قۇقىقتىق جاعىنان تەز ارادا قاراستىرۋدى تاپسىردى. توقايەۆ شەرۋگە شىققاندار قوعامدىق ءتارتىپتى بۇزباۋعا ءتيىس ەكەنىن مالىمدەدى.
قازىرگى ۋاقىتتا ماڭعىستاۋ وبلىسىنىڭ اجقس يەلەرى بيزنەستىڭ الەۋمەتتىك جاۋاپكەرشىلىگى اياسىندا باستاماشىلىق تارتىپپەن گاز قۇنىن ليترىنە 120 تەڭگەدەن 85-90 تەڭگەگە دەيىن تومەندەتۋ تۋرالى شەشىم قابىلداعانى حابارلاندى.
پىكىر قالدىرۋ