جاڭاوزەندە سۇيىتىلعان اۆتوموبيل گازى قىمباتتاۋىنا بايلانىستى ماڭعىستاۋ وبلىسىندا ءوتىپ جاتقان نارازىلىق شارالارى ءسات سايىن ۇلكەيىپ بارادى.

جەلىدە تاراعان سوڭعى اقپاراتتارعا قاراعاندا، اقتاۋدا الاڭعا مىڭداعان ادام جينالىپ، "شال كەت" دەپ ساياسي تالاپتار قويا باستاعان. Facebook-تە كەي قولدانۋشىلار الاڭداعى ادام سانى 10 مىڭنان اسىپ كەتكەنىن جازىپ جاتىر.

سونىمەن قاتار ازاماتتار ۇكىمەت وتستاۆكاسىن تالاپ ەتىپ جاتىر.

3 قاڭتار كەشكە قاراي الاڭداعى ازاماتتارعا وبلىس اكىمى نۇرلان نوعايەۆ كەلىپ،  سۇيىتىلعان گاز باعاسىنىڭ قىمباتتاۋ سەبەبىن تۇسىندىرۋگە تىرىستى. ول  كاسىپكەرلەرمەن قول جەتكىزىلگەن كەلىسىم ناتيجەسىندە باعا 120 تەڭگەنىڭ ورنىنا 85-90 تەڭگە بولاتىنىن جەتكىزدى. الايدا الاڭداعى ادامدار اكىمدى سويلەتپەي "ەلۋ! ەلۋ!" دەپ ايقايلاپ تۇرىپ العان. سونداي-اق جۇرت قالادا ينتەرنەتتى قوسۋدى تالاپ ەتتى.

بۇعان دەيىن نارازىلىققا شىققاندار اقتاۋ قالاسى مەن اۋەجايدى جالعاپ جاتقان جولدى جاۋىپ تاستاعان.

سونداي-اق فورت-شيەۆچەنكو كەنتى تۇرعىندارى نارازىلىق اكسياسىن قولداۋ رەتىندە كەنت پەن اقتاۋ اراسىنداعى جولدى جاپقان.

2 قاڭتاردا جاڭاوزەندە باستالعان نارازىلىق اكسيالارى باسەڭدەمەي، الاڭعا شىعۋشىلار سانى ءسات سايىن ارتىپ جاتىر. بيلىك تە دەگەنىنەن قايتار ەمەس. ولار سۇيىتىلعان گاز قۇنى قىمباتتاۋى نارىقتىق قارىم-قاتىناس ءۇشىن زاڭدى قۇبىلىس ەكەنىن، باعا قايتىپ ءليترى ءۇشىن 50-60 تەڭگە دەيىن تۇسپەيتىنىن ايتادى.