پرەزيدەنت قاسىم-جومارت توقايەۆ ەلدە قالىپتاسقان جاعدايعا بايلانىستى  قازاقستاندىقتارعا ۆيدەوۇندەۋ جولدادى. ۆيدەونى ونىڭ باسپا ءسوز حاتشىسى بەرىك ءۋالي facebook  پاراقشاسىنا جاريالادى.

"قۇرمەتتى وتانداستار، ءقادىرلى اعايىن! بارشالارىڭىزعا تاعى دا ايتارىم، ىشتەن جانە سىرتتان بولعان سان ءتۇرلى جالعان اقپاراتتارعا سەنىپ، ەرەۋىلگە سالىنعان توپتىڭ قيتۇرقى ارەكەتتەرى مەن تارتىپسىزدىككە ەرمەي، پاراساتپەن جانە اقىلمەن عانا شەشىم قابىلداۋعا شاقىرامىن. ازاماتتىق جانە اسكەري ماقساتتاعى قىزمەتتىك عيماراتتارعا شابۋىل جاساۋعا ۇندەيتىن ۇراندار مۇلدەم زاڭعا قايشى كەلەدى. بۇل – ورەسكەل قىلمىستىق ارەكەت. بيلىك قۇلامايدى. ءبىراق بىزگە ءوزارا سەنىم جانە ءوزارا ديالوگ كەرەك"، – دەدى پرەزيدەنت. 

ەسكە سالا كەتسەك، ەكىنشى قاڭتاردا ماڭعىستاۋ وبلىسىنىڭ تۇرعىندارى نارازىلىققا شىقتى. وعان اۆتوكولىككە قۇياتىن گازدىڭ قۇنى ليترىنە 120 تەڭگەگە دەيىن وسكەنى سەبەپ بولعان. نارازىلىق بىلدىرۋشىلەر باعانى 50 تەڭگەگە دەيىن تومەندەتۋدى تالاپ ەتتى. ارنايى قۇرىلعان ۇكىمەتتىك كوميسسيا بەلسەندىلەرمەن كەلىسسوز جۇرگىزىپ، بۇل تالاپ ورىندالاتىنىن مالىمدەدى.

سونداي-اق اقتوبە اكىمدىگى دە نارازىلىق بىلدىرگەندەردىڭ ەكى تالابى – ميتينگ بارىسىندا قاماۋعا الىنعاندار بوساتىلىپ، سۇيىلتىلعان گاز باعاسى 50 تەڭگەگە دەيىن ارزانداتىلعانىن حابارلادى.

الايدا حالىق نارازىلىعى باسىلماي، ادامدار الاڭنان كەتەر ەمەس. كەرىسىنشە جاڭاوزەن مەن اقتاۋعا وزگە دە وڭىرلەر قوسىلىپ، ەل تاريحىنداعى اسا اۋقىمدى حالىق نارازىلىعى بولىپ جاتىر. قازىرگى ۋاقىتتا الماتىدا بەيرەسمي دەرەك بويىنشا 40 مىڭداي ادام الاڭدا ءجۇر. نارازى توپ ساياسي تالاپتار قويىپ جاتىر. ولار جۇيە اۋىسىپ، قاۋىپسىزدىك كەڭەسى ارقىلى بيلىككە ىقپال ەتىپ وتىرعان نۇرسۇلتان نازاربااۆتىڭ ۇلكەن ساياساتتان تۇبەگەيلى كەتكەنىن قالايدى.

كەيبىر مالىمەتتەرگە قاراعاندا، الماتىداعى رەسپۋبليكا الاڭىندا بىرنەشە پوليسيا كولىگى ورتەنگەن. قالا ورتالىعىندا گراناتالاردىڭ دىبىسى ەستىلەدى.