پرەزيدەنت قاسىم-جومارت توقايەۆ توقايەۆ الماتى قالاسى مەن ماڭعىستاۋ وبلىسىندا توتەنشە جاعداي ەنگىزۋ تۋرالى جارلىققا قول قويدى. بۇل تۋرالى اقوردانىڭ باسپا ءسوز قىزمەتى حابارلادى.

"ازاماتتاردىڭ قاۋىپسىزدىگىن جانە قوعامدىق قاۋىپسىزدىكتى قامتاماسىز ەتۋ ءۇشىن زاڭدىلىق پەن قۇقىقتىق ءتارتىپتى قالپىنا كەلتىرۋ، ازاماتتاردىڭ قۇقىقتارى مەن بوستاندىقتارىن قورعاۋ ماقساتىندا مەملەكەت باسشىسى قاسىم-جومارت توقايەۆ الماتى قالاسى مەن ماڭعىستاۋ وبلىسىندا 2022 جىلعى 5 قاڭتارداعى ساعات 01:30-دان 2022 جىلعى 19 قاڭتاردىڭ ساعات 00:00 كەزەڭى ارالىعىندا توتەنشە جاعداي ەنگىزۋ تۋرالى جارلىققا قول قويدى.

پرەزيدەنت تەليەۆيزيا ارقىلى جاساعان ۇندەۋىندە ايتقانداي، ىشتەن جانە سىرتتان بولعان سان ءتۇرلى اقپاراتتارعا سەنىپ، ەرەۋىلگە سالىنعان توپتىڭ قيتۇرقى ارەكەتتەرى مەن تارتىپسىزدىككە ەرمەي، پاراساتپەن جانە اقىلمەن عانا شەشىم قابىلدايدى دەپ ۇمىتتەنەدى"، دەلىنگەن حابارلامادا.

ەسكە سالايىق، جاڭاوزەن مەن اقتاۋدىڭ مىڭداعان تۇرعىنى جاڭا جىلدان كەيىن باعاسى كۇرت شارىقتاپ كەتكەن سۇيىتىلعان گاز باعاسىن ءتۇسىرۋدى تالاپ ەتىپ، كوشەگە شىققان بولاتىن. ولار جولداردى جاۋىپ تاستاعان.

بۇگىن ارنايى قۇرىلعان ۇكىمەتتىك كوميسسيا مۇشەلەرى  جاڭاوزەن جانە اقتاۋ بەلسەندىلەرىمەن كەلىسسوز جۇرگىزىپ، ونىڭ قورىتىندىسى بويىنشا سۇيىتىلعان گاز باعاسى 50 تەڭگەگە دەيىن تومەندەگەن.

الايدا حالىق نارازىلىعى باسىلماي، ادامدار الاڭنان كەتەر ەمەس. كەرىسىنشە جاڭاوزەن مەن اقتاۋعا وزگە دە وڭىرلەر قوسىلىپ، ەل تاريحىنداعى اسا اۋقىمدى حالىق نارازىلىعى بولىپ جاتىر. قازىرگى ۋاقىتتا الماتىدا بەيرەسمي دەرەك بويىنشا 40 مىڭداي ادام الاڭدا ءجۇر. نارازى توپ ساياسي تالاپتار قويىپ جاتىر. ولار جۇيە اۋىسىپ، قاۋىپسىزدىك كەڭەسى ارقىلى بيلىككە ىقپال ەتىپ وتىرعان نۇرسۇلتان نازاربااۆتىڭ ۇلكەن ساياساتتان تۇبەگەيلى كەتكەنىن قالايدى.

كەيبىر مالىمەتتەرگە قاراعاندا، الماتىداعى رەسپۋبليكا الاڭىندا بىرنەشە پوليسيا كولىگى ورتەنگەن. قالا ورتالىعىندا گراناتالاردىڭ دىبىسى ەستىلەدى.