الماتىدا توتەنشە جاعداي كەزىندە 23:00 مەن 07:00 ارالىعىندا كومەندانتتىق ساعات جاريالانادى. بۇل تۋرالى پرەزيدەنت قاۋلىسىندا ايتىلادى.

قۇجات ماتىنە تومەندەگىدەي:

1. ازاماتتاردىڭ ماڭىزدى جانە تىكەلەي قاۋىپسىزىدىگىنە بايلانىستى، قوعامدىق قاۋىپسىزدىكتى قامتاماسىز ەتۋ، زاڭدىلىق پەن قۇقىقتىق ءتارتىپتى قالپىنا كەلتىرۋ، ازاماتتاردىڭ قۇقىقتارى مەن بوستاندىقتارىن قورعاۋ ماقساتىندا 2022 جىلعى 5 قاڭتارداعى 01 ساعات 30 مينۋت پەن 2022 جىلعى 19 قاڭتارداعى 00 ساعات 00 مينۋت مەرزىمى كەزەڭىندە الماتى قالاسىنىڭ شەكارالارىندا توتەنشە جاعداي ەنگىزىلسىن.

2. الماتى قالاسىندا توتەنشە جاعدايدىڭ كۇشىندە بولۋى كەزەڭىندە 23 ساعات 00 مينۋتتان 7 ساعات 00 مينۋتقا دەيىن كومەندانتتىق ساعات ەنگىزىلسىن.

3. توتەنشە جاعدايدىڭ كەزەڭىندە الماتى قالاسىنىڭ كومەنداتۋراسى قۇرىلىپ، وعان قازاقستان رەسپۋبليكاسىنىڭ «توتەنشە جاعداي تۋرالى» زاڭىمەن كوزدەلگەن وكىلەتتىكتەر بەرىلسىن.

الماتى قالاسىنىڭ كومەندانتى بولىپ الماتى قالاسى پوليسيا دەپارتامەنتىنىڭ باستىعى قانات دانيار ۇلى تايمەردەنوۆ تاعايىندالسىن.

4. توتەنشە جاعدايدىڭ كۇشىندە بولۋى كەزەڭىندە مىناداي شارالار مەن ۋاقىتشا شەكتەۋلەر ەنگىزىلسىن:

1) قوعامدىق ءتارتىپتىڭ ساقتالۋى، اسا ماڭىزدى مەملەكەتتىك جانە ستراتەگيالىق وبەكتىلەردىڭ، سونداي-اق حالىقتىڭ تىنىس-تىرشىلىگىن جانە كولىك قىزمەتىنىڭ جۇمىس ىستەۋىن قامتاماسىز ەتەتىن وبەكتىلەردىڭ كۇزەتىلۋى كۇشەيتىلسىن؛

2) الماتى قالاسىندا ءجۇرىپ-تۇرۋ، ونىڭ ىشىندە كولىك قۇرالدارى قوزعالىسىنىڭ ەركىندىگىنە شەكتەلەر بەلگىلەسىن؛

3) جەكە تۇلعالاردىڭ جەكە باسىن كۋالاندىراتىن قۇجاتتاردى تەكسەرۋ، ولاردى جەكە تەكسەرۋ، ولاردىڭ جانىنداعى زاتتارىن، كولىك قۇرالدارىن تەكسەرۋ قامتاماسىز ەتىلسىن؛

4) الماتى قالاسىنا كىرۋ، سونداي-اق ودان شىعۋ شەكتەلسىن؛

5) بەيبىت جينالىستاردى، ويىن-ساۋىق، سپورتتىق جانە باسقا دا بۇقارالىق ءىس-شارالاردى ۇيىمداستىرۋعا جانە وتكىزۋگە تىيىم سالىنسىن؛

6) ەرەۋىلدەرگە جانە زاڭدى تۇلعالاردىڭ قىزمەتىن توقتاتا تۇرۋدىڭ نەمەسە توقتاتۋدىڭ وزگە دە ادىستەرىنە تىيىم سالىنسىن؛

7) قارۋ، ءوق-دارى، جارىلعىش زاتتار، ارناۋلى قۇرالدار، ۋلى زاتتار ساتۋعا تىيىم سالىنسىن، دارى-دارمەكتىڭ، ەسىرتكى زاتتاردىڭ، پسيحوتروپتىق زاتتاردىڭ، پرەكۋرسورلاردىڭ، سونداي-اق ەتيل ءسپيرتىنىڭ، الكوگول ونىمدەرىنىڭ اينالىمىنا ەرەكشە رەجيم بەلگىلەنسىن؛

8) جەكە تۇلعالاردان قارۋ مەن ءوق-دارىنى، ۋلى زاتتاردى ۋاقىتشا الىپ قويۋ، ال زاڭدى تۇلعالاردان قارۋعا، وق-دارىگە جانە ۋلى زاتتارعا قوسا اسكەري جانە جاۋىنگەرلىك وقۋ تەحنيكاسىن، جارىلعىش جانە راديواكتيۆتى زاتتاردى ۋاقىتشا الىپ قويۋ قامتاماسىز ەتىلسىن.

5. توتەنشە جاعدايدىڭ كەزىندە قولدانىلاتىن شارالاردىڭ ىسكە اسىرىلۋىنا جاۋاپتى بولىپ الماتى قالاسىنىڭ كومەنداتۋراسى، قازاقستان رەسپۋبليكاسىنىڭ ىشكى ىستەر مينيسترلىگى، قازاقستان رەسپۋبليكاسىنىڭ ۇلتتىق قاۋىپسىزدىك كوميتەتى، قازاقستان رەسپۋبليكاسىنىڭ قورعانىس مينيسترلىگى، قازاقستان رەسپۋبليكاسىنىڭ توتەنشە جاعدايلار مينيسترلىگى بەلگىلەنسىن.

6. قازاقستان رەسپۋبليكاسىنىڭ باس پروكۋرورى وسى جارلىقپەن بەلگىلەنگەن شارالار مەن ۋاقىتشا شەكتەۋلەردى ىسكە اسىرۋ كەزىندە زاڭدىلىقتىڭ ساقتالۋىن قامتاماسىز ەتسىن.

7. قازاقستان رەسپۋبليكاسىنىڭ ۇكىمەتى توتەنشە جاعداي رەجيمىن قامتاماسىز ەتۋ ءۇشىن قازاقستان رەسپۋبليكاسى ۇكىمەتى رەزەرۆىنەن قاجەتتى قاراجاتتاردى ءبولسىن.

8. وسى جارلىق قول قويىلعان كۇننەن باستاپ قولدانىسقا ەنگىزىلەدى.

الماتىدا ەل تاريحىنداعى اسا ءىرى حالىق نارازىلىعى بولىپ جاتىر. نارازىلىق جاڭاوزەندە سۇيىتىلعان گاز قۇنىنىڭ قىمباتتاۋىنا قارسى وتكەن ميتينگتەرگە قولداۋ رەتىندە باستالعان. الايدا حالىق تالابىنان كەيىن اۆتوكولىك گازى بۇرىنداعىداي 50 تەڭگەدەن ساتىلاتىن بولسپ شەشىلگەنىنە قاراماستان حالىق الاڭداردان تارقامادى.

ولار ساياسي تالاپتار قويىپ، ۇكىمەت پەن ن.نازاربايەۆ وتستاۆكاسىن تالاپ ەتتى. 

حالىق نارازىلىعى الماتىدا كەي جەردە جاپپاي تارتىپسىزدىككە ۇلاسىپ، ەرەۋىلشىلەر بىرنەشە پوليۋيا كولىگىن ورتەپ، اۋدارىپ تاستادى.