اتىراۋ وبلىسى ماقات اۋدانىندا نارازى جۇرت قازاقستاننىڭ ءار تاراپىنا جۇرەتىن پويىزدار وتەتىن توراپتىق تەمىرجولدى   جاۋىپ تاستاعان. بۇل تۋرالى اق جايىق باسىلىمى حابارالدى.

جاڭاوزەندى قولداۋ اكسياسى ماقات اۋدانىندا 4 قاڭتاردا باستالدى. ءقازىر تەمىرجول بويىنداعى نارازىلىق بىلدىرۋشىلەر سانى جۇزدەن استى.

– ءبىز جاڭاوزەندىكتەردى قولدايمىز جانە باعانىڭ وسۋىنە قارسىمىز. ميتينگىمىز بەيبىت، تارتىپسىزدىكتەر ورىن الىپ جاتقان جوق، ءبىراق ءبىز سوڭىنا دەيىن تۇرامىز، – دەيدى نارازىلار.

ال، پويىز جولاۋشىلارى قيىن جاعدايعا تاپ بولدى. «اتىراۋ – الماتى»، «اتىراۋ – ماڭعىشلاق»، «اتىراۋ – اقتوبە» جانە ت.ب. پويىزدار ماقات ستانساسىنا كەرى قايتىپ جاتىر دەگەن اقپارات بار.

ەسكە سالايىق، 2 قاڭتاردا جاڭاوزەندە گاز قىمباتشىلىعىنان باستالعان حالىق تولقۋى رەسپۋبليكانىڭ كوپتەگەن وڭىرلەرىن جاپپاي شارپىپ، كەشە كەشكە الماتى حالقى نارازىلىققا شىققان. الەۋمەتتىك ماسەلەدەن تۋعان حالىق نارازىلىعى بىرتىندەپ ساياسيلانا ءتۇسىپ، ۇكىمەت پەن ن.نازاربايەۆ وتستاۆكاسى تۋرالى تالاپتار قويىلدى.

الماتىدا الاڭ مەن كوشەگە شىققان ونداعان مىڭ ادام اراسىندا تارتىپسىزدىككە بارعاندار، پوليسيا كولىكتەرىن ورتەپ، عيماراتتاردى قيراتقاندار دا بولدى. پوليسيا ادامداردى الاڭنان قايتارۋ ءۇشىن كوزدەن جاس اعىزاتىن، داۋسى قاتتى شىعاتىن،  ءيىسى وكپەنى قاباتىن گراناتالار قولداندى. ازاماتتار مەن پوليسيا قاقتىعىسىنان جارالانعاندار بار.

ق.توقايەۆ ماڭعىستاۋ، الماتى وبلىستارى مەن الماتى قالاسىندا ەكى اپتاعا توتەنشە جاعداي جاريالادى. كوپتەگەن شەكتەۋ ەنگىزىلدى.