پرەزيدەنت قاسىم-جومارت توقايەۆ قاۋىپسىزدىك كەڭەسىنىڭ وتىرىسىندا ەلدەگى جاعدايدىڭ قيىندىعىن ايتىپ، ءبىرقاتار جەدەل شارا قابىلداۋ قاجەت ەكەنىن مالىمدەدى.
توقايەۆ اتالعان توپتار شىن مانىندە، شەتەلدە ۇلكەن دايىندىقتان وتكەن حالىقارالىق تەرروريستەر ەكەنىن جانە ولاردىڭ قازاقستانعا جاساعان شابۋىلىن باسقىنشىلىق اكتى رەتىندە قاراستىرۋ قاجەت ەكەنىن ايتتى.
– وسىعان بايلانىستى قاۋىپسىزدىك القاسى جونىندەگى شارتقا سۇيەنە وتىرىپ، مەن ۇقشۇ مەملەكەتتەرىنىڭ باسشىلارىنا وسى تەرروريستىك ءقاۋىپتى ەڭسەرۋ ءۇشىن قازاقستانعا كومەك كورسەتۋدى سۇرادىم. شىن مانىندە، بۇل – ءقاۋىپ قانا ەمەc، بۇل – مەملەكەتتىڭ تۇتاستىعىنا نۇقسان كەلتىرۋ، ازاماتتارىمىزعا شابۋىل جاساۋ. ولار مەنەن، مەملەكەت باسشىسى رەتىندە تەز ارادا وزدەرىن قورعاۋدى سۇرايدى.
ازاماتتارىمىزدىڭ يگىلىگىن، قاۋىپسىزدىگى مەن تىنىشتىعىن ويلاۋ – مەنىڭ كونستيتۋسيالىق مىندەتىم. سوندىقتان ۇقشۇ-داعى ارىپتەستەرىمە بىلدىرىلگەن ءوتىنىش – ۋاقىتىلى ءارى تولىعىمەن دۇرىس قابىلدانعان شەشىم.
قازاقستان حالقى بۇل شەشىمدى قولدايتىنىنا سەنىمدىمىن. جۇمىلساق، ءسوزسىز، جەڭەمىز. تەرروريستىك توپتار ءىرى ينفراقۇرىلىمدىق وبەكتىلەرگە شابۋىل جاساۋدا. اتاپ ايتقاندا، الماتى اۋەجايى، بەس ۇشاق، ونىڭ ىشىندە شەتەلدىك تە ۇشاقتار باسىپ الىندى. وكىنىشكە قاراي، الماتى قالاسىنا شابۋىل جاسالىپ، قيراتۋعا جانە ۆانداليزمگە جول بەرىلدى. قالا تۇرعىندارى تەرروريستەر مەن قاراقشىلار شابۋىلىنىڭ قۇربانىنا اينالدى. سوندىقتان ءبىزدىڭ، ونىڭ ىشىندە وسىندا قاتىسىپ وتىرعان قازاقستان رەسپۋبليكاسى قاۋىپسىزدىك كەڭەسى مۇشەلەرىنىڭ مىندەتى – ەلىمىزدى سىرتقى قاۋىپتەن قورعاۋ ءۇشىن بارلىق قاجەتتى ءارى مۇمكىن بولعان شارالاردى قابىلداۋ، – دەدى قاسىم-جومارت توقايەۆ.
ەسكە سالايىق، الماتى مەن قازاقستاننىڭ باتىسىنداعى تارتىپسىزدىكتەرگە بايلانىستى بۇكىل قازاقستان بويىنشا توتەنشە جاعداي ەنگىزىلگەن بولاتىن.
تارتىپسىزدىكتەر بارىسىندا 317 پوليسيا قىزمەتكەرى مەن ۇلتتىق ۇلاننىڭ اسكەري قىزمەتشىلەرى ءتۇرلى جاراقاتتار الىپ، 8 ادام قازا تاپقان. الماتىدا جاپپاي توناۋ بولىپ جاتىر.
ءقازىر تارتىپسىزدىكتەردىڭ الدىن الۋ ءۇشىن شارالار قولدانىلىپ جاتىر.
پىكىر قالدىرۋ